Dokumental di Yubi Kirindongo ta bai International film festival

 

“Yubismo: Bida i Arte di Yubi Kirindongo” ta lusi na Caribbean Tales International Film Festival.

[Toronto, Canada] – Sineasta Corry van Heijningen ta kontentu i orguyoso pa anunsiá ku su dokumental eksitante “Yubismo: Bida i Arte di Yubi Kirindongo”, a keda selektá pa e di 18 edishon di Caribbean Tales International Film Festival. E festival akí ta tuma lugá 6 pa 22 di sèptèmber 2023 na Toronto, Canada.

E tema di e festival akí ta sobrebibientenan ekológiko (‘eco survivors’), ku ta tira lus riba e vulnerabilidat di e área di Karibe den kuadro di kambionan klimatológiko. Ku su obranan di arte di materialnan resiklá, Yubi Kirindongo durante añanan a sa di duna un toke partikular na e tema akí.

“Yubismo: Bida i Arte di Yubi Kirindongo” ta enfoká riba e biahe remarkabel di Yubi Kirindongo, un artista yu di Kòrsou ku ta wòrdu elogiá pa su manera ingenioso di uso di materialnan ku keda bentá afó, speshalmente su obranan riparabel trahá di bùmper di metal. E bida di Yubi Kirindongo, karakterisá pa su manera no konvenshonal, ta wòrdu ilustrá pa medio di un variedat grandi di obra di arte, kual kada unu ta personifiká e simplesidad kompliká, e forsa delikado i e bunitesa puru di realidad di Korsou

Corry van Heijningen i Yubi Kirindongo ta gradisí tur spònser di kurason. Nan sostén inkalkulabel tabata di gran balor i a hunga un ròl importante den hasi e pelíkula akí un éksito total. Sin nan generosidat e proyekto akí lo no a kristalisá.

Pa klousurá e festival internashonal, “Yubismo: Bida i Arte di Yubi Kirindongo” lo bolbe keda presentá na Kòrsou pa públiko sèptèmber próksimo.

Sigui nos pa mas informashon i detaye tokante e evento emoshonante akí.