Parlamento di Kòrsou a kontinuá deliberashon ku Minister di Desaroyo Ekonómiko, Gerensia di Damen Shiprepair Curaçao i Gerensia di CDM Holding N.V. enkuanto e último desaroyonan na Damen Shiprepair Curaçao.

Djaluna 25 di sèptèmber 2023, Parlamento di Kòrsou a bini huntu den un reunion Públiko pa sigui ku e deliberashon ku e Minister di Desaroyo Ekonómiko sr. Ruisandro Cijntje, Gerensia di Damen Shiprepair Curaçao i Gerensia di CDM Holding N.V. enkuanto e último desaroyonan na Damen Shiprepair Curaçao.

Na inisio di e reunion, Parlamento a bai di akuerdo ku e proposishon di ordu di sr. Fergino Brownbill, pa minister di SOAW of su remplasante, presentá den Parlamento pa duna splikashon di preguntanan ku a keda hasí, ku ta kai bou di e kartera di labor. Ta trata di preguntanan ku Miembronan di Parlamento a hasi durante e promé tanda, den e reunion Públiko ku a tuma lugá 6 di yüli 2023. Despues di a skòrs e reunion pa algun ora, minister Ornelio Martina, ku ta remplasá minister Larmonie-Cecilia durante su ousensia, a presentá pa kontestá e preguntanan ku tabatin di haber ku aspektonan di labor na e astiero. Seguidamente a sigui ku e dos tanda di pregunta. Presidente di Parlamento sra. Charetti America-Francisca a skòrs te un próksimo aviso pa sigui ku e kontestanan riba e preguntanan hasí.