NOS SELEKSHON TA KLA PA ENFRENTÁ TRINIDAD & TOBAGO MAÑAN 17 DI ÒKTOBER 2023 9’OR DI ANOCHI DEN STADION ERGILIO HATO!
NOS SELEKSHON TA KLA PA ENFRENTÁ TRINIDAD & TOBAGO MAÑAN 17 DI ÒKTOBER 2023 9’OR DI ANOCHI DEN STADION ERGILIO HATO!
E DIA A YEGA!
Tur kos ta kla pa mañan nos topa kara kara ku Trinidad & Tobago pa 9’or di anochi den Stadion Ergilio Hato durante nos último partido di Nations League 2023.
Awe nos selekshon ta tin su último seshon di training ku a bai hopi bon. Nos hungadónan ta hopi animá i ta mentalmente ku físikamente bon prepará pa bai ku e viktoria mañan.
Mañan nos lo tin karchinan disponibel na e lokètnan di SDK for di mainta te anochi ora di wega. Portanan di stadion ta habri for di 7’or di anochi, pues yega trempan pa evitá stagnashon na porta.
Entrada pa e partido entre nos selekshon i Trinidad & Tobago pa e tribunanan kubrí banda di e tribuna di honor ta kosta fl.25 pa adulto miéntras mucha di 6 pa 12 aña i 60+ ta paga fl.15,-.
Preis pa tur sobrá área ta kosta fl.15,- pa adulto miéntras mucha di 6 pa 12 aña i 60+ ta paga fl.5,-
Pa e partido aki lo tin e tremendo ‘fan zone’ ku biaha pasá tabata un ékstiso rotundo.
E ‘fan-zone’ e biaha aki lo ta di 6’or pa mitar di 9 di anochi pafó di stadion Rignaal ‘Jean’ Francisca pa un i tur por gosa promé ku e wega. E ‘fan zone’ aki ta un área kaminda fanátikonan por pasa un ratu ameno promé ku e gran partido aki tuma lugá.
Por disfrutá di músika di Dj T Tesseling i dal un serbes, un refresko òf un bon plato serka Pomm’s. Un ambiente tur afó komo antesala di e tremendo partido di nos selekshon nashonal i Trinidad & Tobago!
Tur kos ta kla pa nos selekshon nashonal su último partido di Nations League 2023 kontra Trinidad & Tobago. Abo so falta ta bin animá i apoyá nos hungadónan p’asina nos por bai ku e viktoria!
Nos ta topa den stadion!
16 òktober 2023
