Delegashon di Parlamento di Kòrsou ta partisipá na un Tripartit entre Kòrsou, Aruba i Sint Maarten.

Delegashon di Parlamento di Kòrsou ta partisipá na un Tripartit entre Kòrsou, Aruba i Sint Maarten.

 

Willemstad 23 di òktober 2023, delegashon di Parlamento di Kòrsou ta partisipá na un Tripartit entre Kòrsou, Aruba i Sint Maarten, ku lo tuma lugá 23 i 24 di òktober 2023 na Sint Maarten.

 

Durante un reunion, e delegashonnan di Parlamentonan di Kòrsou, Aruba i Sint Maarten ta reuní ku otro i interkambiá informashon i puntonan di bista riba vários tópiko ku ta konserní e diferente paisnan.

 

Pa kada Tripartit ta determiná e temanan adelantá ku lo trata durante e reunionnan. Pa e Tripartit a pone e siguiente tópikonan riba agènda:

• palabrashonnan di e Tripartit anterior;
• progreso di un konsepto pa Areglo di Disputa (Geschillenregeling);
• konektividat entre e paisnan den e parti karibense di Reino;
• défisit demokrátiko pa loke ta trata e uso di Leinan di Konsenso komo medio di kontrol;
• reorganisashon di e e sistemanan di impuesto, basá riba e paketenan di Pais (landspaketten);

 

Promé ku apertura di e Tripartit, e lidernan di delegashon di Aruba, Kòrsou i Sint Maarten lo reuní ku un delegashon di Parlamento di Sürnam den un asina yamá “Contactplan Presidium Overleg”. Durante e reunion aki, e 4 delegashonnan lo determiná un agènda pa e siguiente kontakto parlamentario entre e paisnan Aruba, Kòrsou, Sint Maarten i Sürnam.  E último bes ku tabatin un reunion di kontakto asina, tabata na 2019.

 

E delegashon di Kòrsou ta konsistí di e siguiente miembronan:

• Sra. Charetti America-Francisca, ku ta presidente di Parlamento i alabes lider di e delegashon;
• Sr. Amerigo Thode, ku ta presidente di e komishon di Asuntunan di Reino, relashonnan interparlamentario i relashonnan eksterior i miembro di Parlamento pa frakshon di MFK;
• Sr. Sheldry Osepa, miembro di Parlamento pa frakshon di PNP;
• Sr. Quincy Girigorie, miembro di Parlamento pa frakshon di PAR;
• Sra. Giselle Mc William, miembro di Parlamento pa frakshon di MAN;
• Sr. Rennox Calmes, miembro di Parlamento pa frakshon di Trabou pa Kòrsou;
• Sr. Michelango Martines, miembro di Parlamento pa frakshon di KEM.