Petishon pa reunion komishon sentral riba e kuenta anual di APC di 2022 ku direktiva di  APC i ministernan di Finansa i BPD.

 

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Willemstad, 26 òktober 2023

 

Tópiko: Petishon pa reunion komishon sentral riba e kuenta anual di APC di 2022 ku direktiva di  APC i ministernan di Finansa i BPD.

 

Honorabel sra. America-Francisca

 

Pa medio di e karta aki nos ta aserka presidente pa pidi un reunion di komishon sentral ku  direktiva di  APC i ministernan di Finansa i BPD ku e tópiko: Splikashon di e kuenta anual di APC di 2022, su efekto pa e aseguradonan i perspektiva pa futuro.

 

E motibu di nos petishon ta ku e tópiko di penshun a bira sumamente aktual awor ku komunidat di Kòrsou ta pendiente di lokual ta bai pasa den e kaso di Ennia i su efekto riba su aseguradonan. Nos komunidat ta pendiente tambe kon gobièrnu lo solushoná e problema grandi aki.

 

E último añanan nos komunidat a eksperensia hopi inseguridat rondó di kompanianan  ku den  boka di pueblo ta konosí komo sólido pero ku dor di mal maneho, resultadonan finansiero negativo a kondusí na problema pa nan klientenan i pa komunidat en general.

 

Frakshon di PAR no ke warda te ora ku “baka hoga na pos” pero ke risibí informashon konkreto di APC pa asina evitá un sorpresa ku por tin impakto grandi pa finansa di pais i komunidat en general si algu bai robes. APC ta asina grandi ku si algu bai robes kuné esei lo ta devastador pa e sistema finansiero di nos pais.

 

Ta p’esei hasiendo uso di artíkulo 33 di Reglamentu di Òrdu di Parlamento nos ta pidi Presidente pa yama un reunion di Komishon Sentral pa por deliberá riba e tema asina importante.

Mirando tambe ku ta trata di un instituto ku ta di vital importansia pa gobièrnu siendo APC ta e pensioenfonds di ámtenarnan di Kòrsou,nos ta pidi presidente pa invitá gerensia di APC, Minister di Finansa sr J. Silvania  i tambe  Minister di BPD sr O. Martina pa ta presente den e reunion aki.

 

Nos ta konta ku presidente lo yama e reunion aki denter di e tempu stipulá di 2 siman despues ku e petishon aki a drenta.

 

 

Atentamente,

Frakshon di PAR

 

 

 

 

Zita Jesus Leito MBA    Quincy Girigorie      Ana Maria Pauletta   Steven Croes