Minister di Finansa a instruí Servisio di Impuesto pa imponé mas tantu aanslag di impuesto riba entrada i paga mas tantu restitushon posibel promé ku fin di aña.
Minister Javier Silvania
Minister di Finansa a instruí Servisio di Impuesto pa imponé mas tantu aanslag di impuesto riba entrada i paga mas tantu restitushon posibel promé ku fin di aña.
Impuesto riba entrada ta un impuesto imponé via di aanslag. E kontribuyente ta entregá promé un deklarashon di impuesto riba entrada (deklarashon IB). A base di e deklarashon, Servisio di Impuesto ta kalkulá kuantu impuesto e kontribuyente mester paga òf risibí, i ta registrá esaki den un aanslag (imposishon di aanslag).
Den e último 18 lunanan, a hasi hopi esfuerso pa limpia e sistema di dato i rekuperá retrasonan pa traha mas den aktualidat. Komo resultado di e akshonnan aki, e inventarionan di trabou di e diferente tipo di impuestonan a baha konsiderablemente. Sin embargo, aktualmente, ainda tin un kantidat grandi di deklarashon di IB ku mester imponé aanslag riba dje.
Den su karta di 24 di òktober último na Hefe di Inspekshon, Minister a informá ku e ke pa prosesá mas tantu deklarashon di IB posibel promé ku fin di 2023.
Minister a pidi Hefe di Inspekshon pa elaborá un plan di akshon i planifikashon detayá pa eliminá e inventario di trabou relashoná ku aanslagnan di IB ku ainda mester wòrdu imponé, i tambe pa e wòrdu informá periódikamente riba e státus di rekuperashon aki.
Minister ta konsiderá importante pa tantu e aanslagnan positivo (pago adishonal) komo e aanslagnan negativo (restitushon) ser imponé mas lihé posibel. Esaki ta permití e kontribuyentenan kumpli ku nan obligashonnan di paga aanslag di IB, i Servisio di Impuesto tambe ta kumpli ku e derechi di e kontribuyentenan riba restitushon. Ademas, esaki ta evitá ku ta bolbe krea retrasonan muchu grandi den imposishon di impuestonan riba IB.
Sin embargo, aktualmente, ainda tin un kantidat grandi di deklarashon di IB ku ainda mester imponé aanslag riba dje.