PROME MINISTER TA NA HULANDA PA ATENDE CUATRO TEMA IMPORTANTE PA ARUBA
Prome Minister Evelyn Wever-Croes cu biahe di trabou pa Hulanda
PROME MINISTER TA NA HULANDA PA ATENDE CUATRO TEMA IMPORTANTE PA ARUBA
Prome Minister Evelyn Wever-Croes actualmente ta na Hulanda den un biahe di trabou pa atende cuatro tema importante pa Aruba.
RAAD VAN STATE
E prome tema ta e relacion cu Raad van State. Miembro pa Aruba na Raad van State señora
Milly Schwengle ta tuma despedida di Raad van State e luna aki y Raad van State ta organisa un recepcion di despedida y pa esaki a invita Prome Minister di Pais Aruba. Señora Schwengle a sirbi Aruba 6 aña den Raad van State. Durante e 6 añanan a traha hopi estrecho cu Gobierno di Aruba pa cual tur minister ta agradecido pa su labor y esey Prome Minister lo trece padilanti na Hulanda. Mientras tanto e candidato nobo lo wordo aproba pronto pa Conseho di Minister di Reino, y lo wordo anuncia e ora.
RELACION EXTERIOR
E enfasis di e biahe di trabou ta relacionnan exterior. Prome Minister hunto cu Director di Departamento di Relacion Exterior DBB lo tin numeroso reunion na Ministerie van Buitenlandse Zaken pa atende tur tema relaciona cu relacion exterior. E tema di Venezuela lo wordo trata como tambe e posibilidadnan pa estrecha lasonan comercial cu paisnan den region, especialmente Colombia, Republica Dominicana, Panama y Merca. E meta ta pa fortifica Departamento di Relacion Exterior di Aruba.
Prome Minister ta invita tambe pa hiba palabra durante e conferencia “Shaping Feminist Foreign Policy” di Ministerie van Buitenlandse Zaken hunto cu Minister di Relacion Exterior Hanke Bruins Slot.
RELACION DEN REINO
Un punto cu semper ta haya atencion di Prome Minister ora e ta na Hulanda, ta e relacionnan den Reino. Den e cuadro aki lo reuni cu varios instancia y persona cu por asisti den esaki. Por lo menos un biaha pa aña Prome Minister ta purba atende Conseho di Minister di Reino, di cual e ta forma parti, y ora e no por tey, ta apodera e Minister Plenipotenciario, den e caso aki señor Ady Thijsen. Prome Minister a atende e reunion aki siman pasa diabierna. Apesar cu Minister Plenipotenciario Ady Thijsen ta haci un tremendo trabou na Hulanda, semper ta bon pa e Prome Minister mes atende de vez en cuando.
Ademas Prome Minister lo reuni cu Secretario di Estado señora Alexandra van Huffelen y cu Parlamento Hulandes.
ARUBAHUIS
Finalmente Prome Minister lo atende reunionnan cu Minister Plenipotenciario y cu personal di Arubahuis. Arubahuis ta nos representacion di Aruba na Hulanda. Despues di un periodo dificil cu a conduci na investigacionnan administrativo, ta bon pa mira cu tin e trankilidad bek na Arubahuis y cu tur hende ta trahando duro den direccion di e vision comun: posiciona Aruba den Hulanda y den Europa, y asisti nos hendenan na Hulanda. E reunionnan cu Arubahuis lo ta dirigi riba esaki.
Yegando e fin di aña 2023, Prome Minister a indica cu esaki lo ta su ultimo biahe di trabou na Hulanda pa e aña aki.
