ICONS x Jeon ta un kombinashon di otro mundu

E fin di aña’ki e amor ta ‘Na Kandal’

WILLEMSTAD/  ICONS ta inspirá tur sinku sentido di e fanátiko; ta toka e kurason, dushi músika p’e orea, moveshon sensual riba pista di baile, holor dushi di e temporada benidero, i e wowonan di amor pa konkista kualke hende. ‘Na Kandal’ ta tres minüt di puru dulsura. Un historia di amor, ku a keda seyá den sentro di siudat Punda, a pone kandal na e kurasonnan ikóniko na pia di brùg i a benta e yabi den bahia di Sta. Ana. Un amor na kandal, pa tur eternidat. Derrel ‘Titi’ De Palm ta produsí un otro kuadrangular pa ICONS. 

ICONS tin un agènda kompletamente yen e fin di aña aki; ta gradisí tur fanátiko ku lo akudí na eventonan, empresanan ku a buk un fecha, i promotornan ku a organisá konseptonan úniko for di awor pa nan sosten. Na víspera di e temporada mas festivo ICONS ta manda un invitashon personal pa su fanátikonan no pèrdè 29 di desèmber próksimo. E piesa ‘Na Kandal’ lo zona pa promé biaha ‘live’ den Miss Dior Ladies Night. ‘Na Kandal’ ta otro piesa di ICONS x Jeon ku ta primintí di bira un hit sigur e fin di aña aki. Ta invitá fanátiko- i siguidónan pa suskribí na e kanal di KJ74 Entertainment riba YouTube. Tambe, por stream “Na Kandal”  riba iTunes/ Spotify/ Tidal/ Apple Music.