Siman di “Mediawijsheid” ta pone atenshon riba komportashon no-deseá riba plataformanan sosial
Siman di “Mediawijsheid” ta pone atenshon riba komportashon no-deseá riba plataformanan sosial
Willemstad – Konsiente, e movementu lokal ku ta stimulá komportashon respetuoso riba plataformanan sosial, ta pidi atenshon di organisashon i siudadanonan lokal pa Siman di “Mediawijsheid”. Ta probá ku riba plataformanan sosial hende tin e tendensia di inisiá kòmbersashon òf reakshoná riba otro publikashon mas lihé. Por nota tambe ku sa tin komentario ofensivo riba plataformanan sosial. P’esei, durante Siman di Komportashon respetusoso riba plataformanan sosial (“Mediawijsheid”), Konsiente ta pidi tur persona i organisashon ku ta aktivo riba plataformanan sosial pa atvertí ora tuma nota di komportashon ofensivo ku #akinò.
Plataformanan sosial a habri porta pa un mundu nobo, kaminda ta posibel konektá instantaniamente ku otro i ku mundu. Un i tur por tin interkambio ku otro i debí na e pantaya ku ta separá e interakshon, ta fásil pa inisiá kòmbersashon òf duna komentario. Komo ku e mundu di internèt konosé ménos regulashon ku un plataforma sosial di trabou, un korant, emisora òf planta di televishon, hende sa sinti nan mes liber pa ekspresá nan mes sin tene kuenta ku konsekuensia di nan mensahe. P’esei, na numeroso okashon sa sosodé ku por tuma nota di ekspreshonnan ofensivo riba plataformanan sosial.
Den historia di mundu, nos por a mira ku un movementu tin e poder pa tira lus riba komportashon kolektivo no-deseá. Di e forma aki hopi tema a yega na atenshon di mandatarionan, skol i famianan, pa inisiá un kambio den e komportashon no-deseá. Kambio di komportashon ta tuma tempu, pero si kuminsá, por tin resultado tiki tiki. P’esei, na luna di novèmber ta para ketu na e tópiko di komportashon respetuoso riba plataformanan sosial pa medio di e Siman di “Mediawijsheid”. E siman aki ta un inisiativa di Netwerk Mediawijsheid, un organisashon ulandes ku tin komo meta pa promové komportashon responsabel riba plataformanan sosial. Na Kòrsou, Crab Social by Flavina ku su proyekto Konsiente, tambe ta afiliá na Netwerk Mediawijsheid.
Konsiente ta pidi tur organisashon i persona pa para ketu na komportashon respetuoso riba plataformanan sosial. Skol, departamentunan di rekurso humano i gruponan organisá por hasi esaki na diferente manera. Den klas por uza ponensia pa inisiá un kòmbersashon riba dje. Esaki ta konta tambe pa gruponnan organisá. Skol i kompania òf organisashonnan por organisá kurso di komportashon responsabel riba plataformanan sosial pa nan personal.
Pa e aña aki sin embargo, Konsiente ta pidi un i tur pa atvertí ora tuma nota di komportashon ofensivo ku #akinò. E siman ta kore di 10 pa 17 di novèmber.
Pa risibí e boletin digital di informashon di Konsiente ku informashon tokante kiko pa paga tinu riba dje ora ta aktivo riba medionan sosial, por fabor bishitá: https://www.flavinawanga.com/#SocialMediaAwareness. Pa mas informashon tokante kon pa konmemorá e siman na skol òf organisashon/kompania, por manda un email na konsiente@crabsocial.com òf WhatsApp na 525 41 30.
