Kompetensia pa alumno di HAVO i VWO na Kòrsou i Sint Maarten CBCS Best Economic Research Award 2024
Kompetensia pa alumno di HAVO i VWO na Kòrsou i Sint Maarten
CBCS Best Economic Research Award 2024
Willemstad/Philipsburg –Centrale Bank van Curaçao en Sint Maarten (CBCS) ta anunsiá inisio
di e di kuater edishon di e konkurso Best Economic Research Award (BERA) na nivel di HAVO
i VWO. Ta invitá tur alumno ku ta den nan último aña di HAVO òf VWO na Kòrsou i Sint Maarten
pa entregá un ‘profielwerkstuk’ di ekonomia, riba un tópiko ku tin relevansia pa e ekonomianan
di e union monetario. Tantu e alumno(nan) ganadó komo e skol(nan) en kuestion lo risibí un
premio atraktivo di CBCS. Den e promé kuartal di 2024, CBCS lo lansa e konkurso BERA pa
studiante na nivel di Bachelor i Master tambe.
Meta di e konkurso BERA ta di stimulá investigashon ekonómiko bou di e hóbennan na Kòrsou i
Sint Maarten. Fuera di esei, di e manera akí, CBCS ta spera di inspirá e alumnonan pa sigui un
estudio riba tereno di ekonomia. P’esei, kada ganadó na nivel di HAVO i VWO lo risibí un premio
di NAf. 2,500 i un trofeo, miéntras ku e skol ganadó den kada kategoria lo risibí un premio di
NAf. 5.000 i un trofeo.
‘Atraves di e último tres añanan, nos a opservá un oumento den e kantidat di alumno i skol ku ta
partisipá, i un mehora supstansial den kalidat di e obranan presentá. Aña pasá, tantu e alumnonan
komo e dosentenan a mustra hopi entusiasmo pa e konkurso i esei ta presis loke nos ke mira’,
segun Direktor Ehekutivo di CBCS, Dr. José Jardim.
Pa fomentá partisipashon di e alumnonan, CBCS a tene un enkuentro ku e dosentenan di e skolnan
HAVO i VWO na Kòrsou i Sint Maarten resientemente, kaminda por a risibí nan komentarionan i
aporte na e programa, i yega na palabrashon tokante fecha. Den e próksimo simannan, lo organisá
seshon informativo na e skolnan sekundario na Kòrsou i Sint Maarten, pa motivá e studiantenan
pa partisipá na e kompetensia.
Mas informashon tokante e kondishonnan pa partisipá, e reglanan di e konkurso i e kriterionan di
evaluashon ta disponibel na http://www.centralbank.cw/education/best-paper-award.
Willemstad, 21 di novèmber 2023
CENTRALE BANK VAN CURAÇAO EN SINT MAARTEN