Dunando forma na kostanan di mañan: futuro di restorashon di habitat na kosta

Dunando forma na kostanan di mañan: futuro di restorashon di habitat na kosta
Un laso di kolaborashon nobo entre Wereld Natuur Fonds – Hulanda (WWF-NL), Dutch Caribbean Nature Alliance (DCNA) i Coastal Dynamics lo kana dilanti den un inisiativa pa definí futuro proyektonan di konservashon i restorashon dentro di e habitatnan na kosta di e área hulandes karibense. E estudio di faktibilidat ambisioso akí, ku ta konsentrá rònt di palu di mangel i kama di yerba di laman, tin komo meta pa kompilá un portofolio di proyekto ku enfoke riba futuro. E meta ta pa fortifiká e áreanan akí kontra menasanan ku ta eskalando, manera kambio di klima, kontaminashon i desaroyo no-sostenibel di kosta, di manera ku den un forma duradero nan ta keda salú i resiliente.
Àrea karibense ta hospedá ekosistemanan úniko ku ta enfrentá desafionan manera konsekuensia di sobredesaroyo, kambio di klima i otro formanan di preshon riba medio ambiente. Ekosistemanan na kosta ta representá áreanan di importansia krusial, prinsipalmente ora ta trata di nan biodiversidat, resiliensia klimátiko i patrimonio kultural. E estudio di faktibilidat proponé tin komo meta pa yena e burakunan ku tin riba tereno di ekspertisio, rekurso i kolaborashon na tur e seis islanan di Karibe Hulandes (Aruba, Kòrsou, Boneiru, Saba, Sint Maarten i Sint Eustatius).

Meta
E meta prinsipal di e proyekto ta ehekushon di un estudio di faktibilidat profundo den kuadro di DCNA su Programa di Konservashon i Restorashon di Habitatnan Mas Importante. E partinan mas importante di e investigashon ta entre otro evaluashon di e estado aktual di palu di mangel i kama di yerba di laman, enbolbimentu di stakeholdernan i realisashon di un evaluashon general di e rekursonan.
Solushon basá riba naturalesa
E investigashon ta bai dirigí su mes riba restorashon di áreanan di kosta, ku un enfoke spesífiko riba palu di mangel i kama di yerba di laman, den kolaborashon ku organisashonnan di parke di Karibe Hulandes. E meta ta pa desaroyá un aserkamentu naturalesa-inklusivo ku solushonnan basá riba naturalesa pa oumentá resiliensia i sostenibilidat. En general e proyekto akí tin dos ophetivo prinsipal:
• Estudio di faktibilidat: Evaluá viabilidat di esfuersonan di konservashon di naturalesa, inkluso eksigensianan tékniko, finansiero i di rekurso humano.
• Kompartí konosementu i desaroyá kapasidat: Presentá konklushonnan, atendé ku falta di konosementu i desaroyá kapasidat serka organisashonnan di parke pa inisiativanan efektivo di restorashon.

Planifikashon adelantá
Éksito di e estudio di faktibilidat ta krusial pa krea un komprendementu integral di kondishon di e habitatnan na kosta, pa promové kolaborashon i pa pone un base pa futuro programanan di restorashon. Pa medio di uni esfuerso, e investigashon ke mehorá komunikashon, interkambio di konosementu i uso di rekurso na tur e seis islanan.