Tres skol di fundeshi na Banda Abou hasiendo preparashon pa Festival di Funchi

Tres skol di fundeshi na Banda Abou hasiendo preparashon pa Festival di Funchi

WILLEMSTAD – Djadumingu awor, 3 di desèmber, lo tuma lugá un tremendo ‘Festival di Funchi’ realisá pa tres skol di fundeshi nan Banda Abou. E skolnan en kuestion ta Kolegio Annie Koenraad, Kolegio Don Sarto i Kolegio San José. Fundashon Negoshi Pikiña ta e organisashon ku hasi preparashon i a duna guia na e skolnan na e proyekto piloto aki. Ophetivo di e proyekto ta pa lanta serka hóbennan di grupo 6 i 7 di e skolnan menshoná un sentido empresarial. E hóbennan pa algun luna a haña lès dirigí pa informá nan kiko ta nifiká lanta i manehá un mini empresa. Algun aspekto ku a kubri durante di e lèsnan ta entre otro kon apliká kreatividat, kon ta traha huntu pa logra un meta komun i tambe a traha pa lanta outo-estíma i sentido di perseveransia serka e hóbennan. Alabes a siña nan kon anda ku sèn, kon ta merkadeá un empresa, i hasi uso efektivo di media sosial pa hasi merkadeo i komunikashon.

E proyekto piloto ta kai bou di e paraplü di Global Entrepreneurship Week (GEW) komo un ‘post GEW event’. Pa e parti práktiko di e proyekto a tuma e desishon ku lo laga e hóbennan krea produktonan di konsumo ku tin komo ingrediente básiko funchi. Ta konosí ku hariña di funchi ta un produkto esensial den nos kushina krioyo. E enkargo ta kon por produsí, di un forma kreativo, produktonan di konsumo ku ku hariña di funchi.

Fundashon Negoshi Pikiña a prepará material di lès pa e parti teorétiko, miéntras guia di e proyekto piloto tabata den man di dosentenan di e skolnan, ‘onderwijs assistenten’ i mayornan. E último grupo aki a risibí preparashon den esfera di ‘train the trainer’. Alabes algun empresario eksperensiá tambe a duna nan aporte na e lèsnan i tambe algun kompania. Guia na e muchanan riba dia di e Festival di Funchi ta na enkargo di ‘onderwijs assistenten’.

E ganashi di benta di e produkto riba e dia di e Festival di Funchi, 30 porshento ta bai algun organisashon ku ta hasi trabou di bon kousa, i e sobrá lo bai pa e skol.

E entusiasmo bou di e studiantenan ta haltu motibu pa kua ta enkurashá komunidat di Kòrsou den su totalidat pa bishitá e skolnan djadumingu awor i duna sosten na e muchanan i e ‘Festival’. Lo por disfrutá di un gama amplio di produktonan sukulento ku studiantenan di e tres skolnan a produsí for di e mente kreativo ku nos muchanan tin.