Eksitoso siman di informashon tokante Fondonan Oropeo ta sigui duna fruta. Siman di Informashon tokante Fondo Oropeo.
Eksitoso siman di informashon tokante Fondonan Oropeo ta sigui duna fruta.
Siman di Informashon tokante Fondo Oropeo.
Pa di sinku bia EU Desk Curaçao a tene un eksitoso siman di informashon tokante posibilidatnan pa hasi uso di Fondonan Oropeo. E aña aki a kombiná e evento ku selebrashon di sinku aña eksistensia di e Desk di informashon. Pa esaki a tene un konferensha dia 12 di Desèmber den Renaissance Hotel ku a konta ku 80 partisipante. Tema di siman di informashon di e aña aki tabata: “Diaspora Dynamics , Empowering Curaçao’s Future through Knowledge Transfer”. Ku esaki EU Desk Curaçao i Ministerio di Desaroyo Ekonómiko (MEO) a kontinuá e strategia ku a inisiá na 2020 pa integrá nos Diaspora den desaroyo ekonómiko di Kòrsou. Ademas di a logra e meta di duna informashon eksitosamente, e siman a sirbi pa stimulá mas proyekto finansiá ku fondo Oropeo.
E aña aki EU Desk Curaçao a wak kon por enbolbí konosementu i abilidatnan ku nos Diasporá a atkerí den eksterior, pa yuda hasi mihó uso di fondonan Oropeo den implementashon di e National Export Strategy ku MEO a desaroyá. Tur aña Union Oropeo ta pone un presupuesto kuantioso disponibel pa yuda entidatnan den Oropa i paisnan ku ta ligá ku Oropa. Esaki ta konta pa nos islanan ku ta forma parti di reino Hulandes tambe. Meta di e siman di informashon ta pa krea interes serka instansianan lokal pa hasi uso di fondonan Oropeo i pa yuda nan apliká pa finansiamentu.
E siman di informashon a konsistí di 19 seshon virtual i e konferensia ku a tuma lugá personal na Reneissance Hotel. Un total di 420 persona a asistí na e eventonan i 22 orador a duna informashon durante e diferente presentashonan. Temanan ku a keda tratá ta entre otro kon nos diaspora por kontribuí ku transferensia di konosementu den area di teknología, Salubridat, Sektor Maritímo i sektor Kreativo. Diferente Yu di Kòrsou ku ta biba den eksterior i otronan ku a yega di biba den eksterior a kompartí nan eksperensia i a duna rekomendashon kon por hasi mihó uso di nan konosementu pa yuda nos ekonomía.
Durante e konferensia, ku a konta ku presensia di 80 partisipante, Minister di Desaroyo Ekonómiko, sr. Ruisandro Cijntje a enfoká riba balor di e ‘Desk’. E Minister a splika ku e servisio aki tei pa keda pa yuda realisá ku e fondonan Oropeo ku nos organisashonnan ta bin na remarke pe, realmente ta yega serka e organisashonnan. Kabes di skol Nilda Pinto SBO, ku ta un di e skolnan lokal ku ta hasiendo bon uso di e fondonan aki a kompartí su eksperensia i a splika ki benefisionan esaki tabatin pa su skol. Hefe di EU Desk Curaçao, sra Vanessa Toré a splika kon e servisio aki durante e sinku añanan a yuda pa engrandesé e konosementu lokal tokante posibilidatnan pa hasi uso di e fondonan, mientras kolaborador di e Desk, sra Eunice Eisden a mustra riba e balor di kolaborashon entre instansianan pa realisá proyektonan ku eksito.
Sr. Guido Rojer ku ta entre otro enkargá ku proyektonan finansiá pa e programa Oropeo ‘European Solidarity Corps’ a suprayá e importansia di kolaborason i aktualmente esaki a keda probá un bia mas ora ela haña e grato notisia ku un mas petishon pa fondo a keda aprobá. E bia aki di e programa Erasmusplus. Representantenan di instituto Probista tambe a duna un presentashon durante e konferensia i a konta di nan biahe pa bishitá Parlamento di Bruselas ku a keda finansiá ku fondo Oropeo. E konferensia a klousura ku presentashon di konsehero di EU Desk Curaçao sra. Margit de Freitas ku a informá di un kurso pa traha un strategia pa apliká pa fondo ku ela desaroyá pa EU Desk Curaçao. Pronto ta bai kuminsá ku e kurso aki.
EU Desk Curaçao, ku ta e sentro di kontakto na Kòrsou pa programa- i fondonan Oropeo di supsidio, ta un departamentu di Sektor di Koperashon Ekonómiko Internashonal di Ministerio di Desaroyo Ekonómiko. Esaki ta di sinku bia ku e ‘Desk’ ta organisá un evento dediká na Fondonan Oropeo. E promé a tuma lugá na 2019 ora diferente agensia Hulandes ku ta representá e fondonan Oropeo a bin duna informashon den World Trade Center. Mas di 800 persona a partisipá na e enkuentronan ei. E lockdown kousá pa pandemia a pone ku e siguiente añanan a move pa un formato virtual. Esaki a resultá un eksito i a fasilitá partisipashon di tur e islanan ku anteriormente tabata forma Antia Hulandes.
Ademas di e oradornan aki tabatin diferente seshon di informashon kaminda a splika kua ta aspektonan ku mester tene kuanta ku ne ora ta yena un aplikashon pa supsidio. Tambe a dediká atenshon na proyektonan eksitoso, i kon por mehorá e chèns di eksito. Un di e instansianan ku a duna informashon ta Erasmusplus Hulanda, ku ta un agensia Hulandes ku ta traha ku e programa Erasmusplus. Esaki ta un fondo basta konosí na nos islanan den sektor di enseñansa. Trahadónan di e agensia aki ta pará klá pa yuda institutonan lokal ku nan proseso di aplikashon.
Hopi bia ta parse difisil pa logra haña supsidio di fondonan Oropeo, komo ku e proseso por ta kompliká i burokrátiko. Tòg tin diferente aplikashon ku ta keda aprobá, manera supsidio pa produkshon di sine ku produktornan na Kòrsou a risibí, supsidio ku skol- i universidatnan ta risibí pa interkambio di studiante i personal i proyektonan pa desaroyo di hoben.
EU Desk Curaçao ta wak bèk riba un siman kargá ku informashon relevante pa tur organisashon- i persona ku ke sa mas di posibilidatnan di risibí supsidio di fondonan Oropeo. Por haña mas informashon di e temanan i tokante e kurso pa siña kon apliká pa fondo, riba paginanan sosial di EU Desk Curaçao riba Facebook i LinkedIn: EU Desk Curaçao, i por wak e videonan riba e kanal di Youtube: EU Desk Curaçao. Por yama tambe (tel: +599 9 462-1444, Mail: eudeskcuracao@gobiernu.cw
