Parlamentario David Seferina na Minister di Desaroyo Ekonomiko ku tópiko; ” Si kier sigui promové turismo mester sòru pa tin aktividat turístiko den sentro di siudat tambe “
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 17 di yanüari 2024
Tópiko: Petishon pa dirigí pregunta na Minister di desaroyo ekonómiko
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di desaroyo ekonómiko señor Ruisandro Cijntje
Danki pa e koperashon.
Atentamente,
David Seferina
Parlamentario pa
frakshon di MFK
Minister di Desaroyo ekonómiko
Señor Ruisandro Cijntje
PRESENTE
Kòrsou, 17 di yanüari 2024
Tópiko: Si kier sigui promové turismo mester sòru pa tin aktividat turístiko den sentro di siudat tambe
Apresiabel minister Cijntje,
Banko Sentral di Kòrsou i St. Maarten(BSKS) a emití den nan último publikashon, un kresementu ekonómiko di 4,1 porshento pa aña 2023. Esaki den bista di BSKS a surpasá e kresementu ekonómiko di pais promé ku e pandemia di COVID-19. Mas aleu “World Tourism Organization” a publiká nan evaluashon pa e destinashonnan ku e mihó “performance” mundialmente pa turismo, kaminda a posishoná Kòrsou na e di 9.
Suskrito ta aploudí kon bo persona a bin ta promové turismo redundando den kresementu ekonómiko pa pais pero alabes rekonosementu riba panorama mundial. Den kuadro di esaki suskrito kier hasi uzo di espasio pa para ketu na algun posibel área di mehorashon. Un di e áreanan ta, falta di aktividat turístiko den nos sentro di siudat.
Nos sentro di siudat últimamente ta yena ku turista ku ta bin pa disfrutá di loke Kòrsou tin pa ofresé. Apesar ku tin guia turístiko ku ta duna guia na entre otro gruponan di turista, no tin òf tin poko aktividat pa brinda e turista e eksperensia kultural i sera konosí ku nos paisahenan. Banda di esaki no tin un puntonan di informashon(kiosko) ku ta duna bista di loke nos sentro di siudat tin pa ofresé.
Pa suskrito ta importante pa nos sigui fortifiká Kòrsou komo un di e mihó destinashonnan den Karibe. Mester traha riba programanan turístiko konhuntamente ku “stakeholders” ku enfoke riba e goya ku ta nos sentro di siudat”.
P’esei pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di Desaroyo ekonómiko señor Ruisandro Cijntje;
- Minister ta na altura ku na momentu ku tin grupo grandi di turista den nos sentro di siudat ta poko ta e aktividatnan turístiko ku tin pa ofresé?
- Ki maneho minister lo bai hiba pa por tin aktividat turístiko den sentro di siudat “muy especial” ora tin grupo grandi di turista?
- Minister a sinta huntu ku DMO i tambe CTB tokante e tema aki?
- Minister tin un maneho pa laga “Politur” atendé ku seguridat pa e turistanan den sentro di siudat?
- Minister a pensa pa pone un sentro di informashon (Kiosko) pa e turistanan por risibí informashon di nos sentro di siudat?
- Minister tin maneho pa uzo di baño públiko den sentro di siudat? Si ta si, tin bòrchinan ku ta indiká unda esakinan ta?
- Minister tin pensa huntu ku “stakeholders” pa pone gruponan kultural pa entreten’é ora tin gruponan grandi di turista?
- Minister ta na altura ku si no hasi nada, ta den un sentro di siudat morto e turistanan ta bini?
Rekordando bo persona na e obligashon den nos areglo di estado pa duna miembronan di parlamento tur informashon rekerí i na e obligashon den e protokòl firma entre parlamento i gobièrnu pa duna e informashon aki no mas tarda ku denter di (2) luna, frakshon di MFK ta keda en espera di bo kontesta.
Atentamente,
David Seferina
Parlamentario pa
frakshon di MFK
