Koro Sta. Famia  ta saka miembro di aña

Koro Sta. Famia  ta saka miembro di aña

 

 

WILLEMSTAD – Koro Sta. Famia ta saka miembro di aña.

 

Manera ta e tradishon, tur aña Koro Sta. Famia ta hasi un aktividat pa miembronan. E aña aki ela bai den forma di un aktividat kaminda miembronan por a bini ku nan famia pa pasa un ratu ameno huntu ku tur miembro di e kor.

 

Famia ta un parti importante mirando ku e famia ta esun ku tin ku karga ku e miembro na momentunan di un of mas presentashon di di e koro.

 

E aktividat a tuma lugá  djasabra ultimo na Omundo.

 

Durante di e aktividat a saka tambe miembro di aña i “partij” di aña 2023.

 

E miembro di aña ta e miembro ku a kumpli bon ku palabrashonnan di kor, e tin disiplina i tambe ta desaroyá su mes riba e tereno musikal.

 

E aña aki e premio a bai pa Jeandro Casper ku ta pianista di kor. E hoben aki a demostra den korto tempu su abilidatnan den e kor i asina a desaroyá i bira un gran mύsiko.

 

Pa loke ta trata e “partij” di aña e premio a bai pa e grupo di sopran e aña aki. E grupo di sopran ta konsistí di Margareth Craneveldt, Vanessa Eliza, Edestria Nicolina, Druci-Anne Cork, Daïxa Menshe i Ghisa Lourens.

 

E dama nan aki tambe a hasi èkstra esfuerso dor di tuma “workshopnan” di kanto den nan tempu liber, pa asina mantené e kanto na nivel. I esaki a reflehá tambe durante e aña ku a pasa.

 

Koro Sta. Famia ta orguyoso di tur su miembronan i ke gradisí kada unu tambe ku ta duna hopi di nan tempu liber na e organisashon pa asina por sigi promove kanto pa pueblo di Kòrsou.