E DI TRES EDISHON DI AQUALECTRA DEN BO BARIO TA TUMA LUGÁ DEN ÁREA DI STA. MARIA
Willemstad 19 di Februari 2024 – Djasabra 2 di mart, Aqualectra a skohe pa bai mas serka komunidat dor di trese servisio, informashon i ambiente den e di tres edishon di ‘Aqualectra den bo bario’. Esaki lo tuma lugá na Churchill Plaza i e enfoke lo ta primordialmente riba habitantenan di Kanga, Dein, Buena Vista i Sta. Maria. Aqualectra ta invitá tur kliente ku di un òf otro forma no ta alkansá regla nan asuntunan di Aqualectra durante di siman pa bin risibí servisio personalisá durante e enkuentro aki. Lo tin oportunidat pa risibí informashon diverso tokante di uso konsiente, resibu, produkshon i distribushon di awa i koriente. Lo tin tambe área di inovashon i área dibertido kaminda por hunga e weganan inovativo di Aqualectra ku chèns pa gana premio pa tur edat. Animashon lo ta na enkargo di DJ Atley i Grupo Orirí.
Apesar di e echo ku e meta prinsipal di Aqualectra ta pa duna komunidat servisio na promé lugá, ta hasi uso di e momentu den bario pa duna bèk di un manera òf otro na komunidat. E edishon di Sta. Maria aki lo konta ku presensia di empresarionan lokal ku lo tin kuminda i bebida na benta pa sisti e stoma miéntras ta disfrutá di e ambiente di Aqualectra den bo bario. Nos laboratorio nashonal ADC su bùs di salú tambe lo t’ei pa midi suku i preshon. Lo tin aktividat speshal pa e muchanan tambe pasa un ratu ameno ku e famia di Aqualectra. I na final di e atardi pueblo lo por gosa di e banda kultural di momentu, esta Grupo Orirí.
Aqualectra den bo bario ta un inisiativa den barionan na Kòrsou ku Aqualectra lo sigui kuné durante di aña pa yega mas serka di su klientenan pa atendé keho i duna servisio. Dor di hasi esaki Aqualectra ta trahando konsientemente pa bira e partner konfiabel di utilidat pa su klientenan. Pueblo di Kòrsou kompletu ta invitá pa probechá di e oportunidat aki i regla asuntunan pendiente serka Aqualectra.



