Kòrsou ta selebra Dia Mundial di Salú: Mi salú, mi derechi
Dia Mundial di Salú ta un dia mundial de konsientisashon di salú ku ta wòrdu selebrá tur aña riba 7 di aprel, bou di patrosinio di e Organisashon Mundial di Salú (World Heath Organisation), i otro organisashonnan relashoná.
Ta selebrá e dia ku e propósito pa promové salú komo un derechi básiko i universal, aksesibel pa tur hende den e diferente regionnan di mundu. P’esei a skohe komo tema e aña aki: Mi salú, mi derechi.
Kòrsou ta selebrá Dia Mundial di Salú Den e kuadro di esaki, Ministerio di Salubridat ta reflehá riba un par di mehorashonnan ku a bin ta realisá e último tempunan den kuido en relashon ku e tema di derecho riba salubridat.
- Entre e logronan aki ta inkluí e habrimentu di huisartsen post (HAP) nobo pa brinda atenshon mas aksesibel na poblashon den oranan pafó di ofisina.
- Ademas, a logra redusí e lista di espera pa operashonnan di katara na wowo, dor di ortorga permit na hospital Advent pa amplia nan grupo di specialista, loke ta redusí kehonan di pashèntnan i ta drecha kalidat di bida di pashèntnan despues di operashon.
- Otro logro ta e introdukshon di operashonnan na rudia ku ta tuma lugá na e hospital nobo, Curacao International Clinic, kontribuyendo asina na mehorashon di kalidat di bida di e pashèntnan.
- A duna supsidio èkstra na diferente entidatnan den salubridat pa mehorá kuido pa pashèntnan, manera entre otro Famia Plania, Hugenhottz, Birgen di Rosario, Brasami, Betesda, FMA, PSI – Skuchami, SGR Groep, Caprileskliniek i Sonrisa.
- Aprobashon, finansiamentu i start di e proyekto pa realisá “gezinsvervangende woningen” pa 40 persona ku desabilidat intelektual moderá.
- Ministerio a traha duru pa por otorgá diferente médiko nan pèrmit nesesario pa por práktika medisina na Kòrsou.
- A kumpra ambulance nobo i a inisiá un proyekto di optimalisashon di kuido di ambulance.
- A aprobá un plan pa realisá un edifisio nobo pa Fundashon Duna Lus (Kraamkliniek) den e proyecto pa desaroyá e area di Kolon.
- A kuminsá ku un proyekto di restrukturashon di nos servisionan di salú mental, tantu e kuido ambulante, e kuido interno komo e kuido di adikshon.
- A kuminsa ku un projecto pa optimalisa alohamentu di personal di G&GZ (antes GGD) i departamentu di Jeugdgezondheidszorg. Esaki pa duna e trahador un luga optimal pa funshona i pa duna publiko un bon servisio. G&GZ ta den proseso di mudansa pa e área di salú na Colon ku lo kulminá medio di e aña aki , miéntrastantu ta traha riba e plan di renobá e konsultorionan di JGZ lo wòrdu drechá.
- Komo parti di e landspaket, ta trahando duru pa reformá nos servisio di salubridat, ku e afán pa garantisá su kalidat, aksesibilidat i sostenibilidat. Tambe ta hasi tur lo ke ta posibel pa drecha efisiensia di nos hospitalnan y di nos Banko di Seguro Soshal (SVB).
Ministerio di Salubridat ta reafirmá su kompromiso ku bienestar di komunidat, trahando inkansabelmente pa garantisá akseso ekivalente na tur e servisionan pa henter e komunidat. Mi salú, mi derechi.

