Minister Pisas a hasi entrega ofisial di 10 boto i 5 motor di boto na piskadónan   

Minister Pisas a hasi entrega ofisial di 10 boto i 5 motor di boto na piskadónan   

Willemstad – Djadumingu último tabatin un aktividat na Soto kaminda durante un enkuentro ameno Minister Pisas a hasi entrega ofisial di 10 boto di piskadó i 5 motor di boto na piskadónan ku nan boto a keda destruí òf pèrdè motor durante e mas resien mal tempu. Na luna di febrüari tabatin un mal tempu ku a okashoná un asina yamá “zuiderwest” ku a kue vários piskadó di sorpresa. A konsekuensha di esaki diferente boto a keda destruí komo ku piskadónan no a haña chèns pa pone nan boto riba tera.

Durante su diskurso Minister Pisas a mustra ku na 2011 tambe tabatin un proyekto similar kaminda a hasi entrega di 5 boto i 5 motor na piskadónan. Pa loke ta trata e piskadónan ku aworaki a risibí boto òf motor di boto mester bisa ku ta trata aki di piskadónan di tur parti di Kòrsou. Minister Pisas a anunsiá tambe ku pronto den e siguiente fase lo hasi entrega di 10 boto i motor mas na piskadónan. Esaki pa garantisá ku pueblo di Kòrsou ta disponé di sufisiente piská komo esaki ta di sumo importansha pa nos seguridat alimentisio. Despues ku pastor a bendishoná e piskadónan i e botonan a sigui un selebrashon ameno ku esnan ku tabata presente.