Tópiko: Eksplotashon laboral ta duna un impreshon ku inspekshon laboral no ta funshoná optimal
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 8 di aprel 2024
Tópiko: petishon pa dirigí pregunta na Minister di Desaroyo Sosial , Labor i Bienestar.
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di SOAW, señora Ruthmila Larmonie-Cecilia.
Danki pa e koperashon.
Atentamente,
Maria Nita
Parlamentario pa
frakshon di MFK
Minister di SOAW
PRESENTE
Kòrsou, 8 di aprel 2024
Tópiko: Eksplotashon laboral ta duna un impreshon ku inspekshon laboral no ta funshoná optimal
Apresiabel Minister Larmonie-Cecillia,
Kresementu ekonómiko ta vital pa oumentá kuponan di trabou i alabes ta e rekurso pa superá pobresa. Un tema ku frekuentemente tin atenshon den medionan di komunikashon, pero e realidat ta ku mas atenshon mester bai na e merkado laboral. Esaki ta notabel si para ketu na e kantidat di desigualdat i eksplotashon laboral ku tin riba e merkado laboral.
Ta importante pa eliminá eksplotashon laboral, eliminá tur tipo di abuso ku ta wòrdu kometé kontra di e trahadó, den tur sektor inkluyendo sektor públiko. Hopi abuso relashoná ku pago di salario bou di suèldu mínimo, trahadónan ta wòrdu someté pa traha oranan largu, sin kompensashon di kuminda. Kondishon di trabounan peligroso, sin kompensá adekuá.Eksplotashon laboral no ta solamente afektá pago salarial, pero tambe aspektonan sosial , ekonómiko, moral, físko i mental di e trahadó.
Sektor di labor mester fortifiká mekanismo di inspekshon i sigurá derecho di kada trahadó inkluso esnan ku un limitashon físiko i mentalmente debil(zwaakbegaafd). Mas aleu mester fortifiká kòntròl riba e loke e doño di trabou ta retené di prima na SVB. Diferente kaso tin, di situashon insolito ku trahadónan ta aserká SVB pa nan nesesidat médiko, ta resultá, ku nan no a wòrdu registrá na SVB. Loke doñonan di trabou ta hasi ta, retené e parti ku e trahadó tin ku paga pero esaki nan no ta traspasá pa SVB.
Pregunta;
- Minister tin informashon i sifranan di kontrolnan den e sektor laboral relashoná ku problemátiko di eksplotashon laboral ?
- Minister tin informashon kon frekuente e kontrolnan ta tuma lugá i kon e prosedura na momentu ku detektá iregularidat ?
- Minister kua ta e maneho pa konsientisá e dunadónan di trabou riba e tópikonan aki?
- Ministerio di SOAW ta brinda informashon na e klase trahadó pa nan ta konsiente di nan derechonan ?
- Minister ta na altura di kompania ku no ta paga prima di trahadónan na SVB?
- Minister, e personanan ku limitashon físiko òf mental, ku tambe tin derecho pa laborá, kua ta e maneho pa duna nan informashon, guianan i kontrolá, ku e doño di trabou ta kumpli ku e tipo di kondishon personal aki i sigur nan derecho laboral?
- Minister kua ta e frekuensia ku ta kontrolá (steekproefcontrole) relashoná ku e restrikshon inhumano ku ta wòrdu imponé durante ora di trabou?
Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento.
Atentamente,
Maria Nita
Parlamentario pa
frakshon di MFK
