OPORTUNIDAT PA FORMASHON MUSIKAL MAS AVANSA PA MUSIKONAN AKTIVO DEN GRUPONAN KULTURAL
OPORTUNIDAT PA FORMASHON MUSIKAL MAS
AVANSA PA MUSIKONAN AKTIVO DEN GRUPONAN KULTURAL
WILLEMSTAD — Direktiva di AMAK kontinuando ku un trayekto di mas ku 20 aña ta sigui ku su esfuersonan pa elevá nivel musikal di nos músikonan lokal. Ta konosí ku e Musikal proyekto di Formashon Musikal ku AMAK i Instituto pa Formashon a realisá durante kultismo añanan, a duna su fruta i klaramente por mira den konsiertonan grandi manera Festival di Tumba, kantadó mayó i konsiertonan internashonal, ku hóbennan ku a atkerí e konosementu musikal profeshonal aki, a duna muestra ku nan ta un bon músiko.
Durante e último Festival di Kantadó Mayo p.e. tabata notabel ku tin un kantidat di hóben ku talento ta partisipando na e evento aki. Ta bèrdat tambe ku p.e. durante Festival di Tumba tin un skarsedat di agrupashonnan musikal i komo tal hopi hóben kantante i kompositor ta ser privá di un partisipashon.
Relashoná ku e situashon aki, AMAK a elaborá un proyekto pa durante un periodo di 7 luna duna hóbennan ku ya kaba ta aktivo den farándula, pero ku tin falta di un formashon musikal adishonal, e oportunidat pa forma parti di un proyekto pa formashon musikal na nivel mas haltu.
Direktiva di AMAK a reserva un fondo limitá pa yuda kubri gastunan di partisipantenan hóben ku ya kaba ta aktivo den farándula lokal, pa di e forma a ei por krea mas gruponan musikal, sea ku e hóbennan ta keda huntu o ku nan ta forma parti di e agrupashonnan musikal eksistente.
Direktiva di AMAK lo duna un sosten finansiero pa di e forma ei redusí e tarifa di lès mas abou posibel. E disiplinanan ku lo ser trata durante di e trayekto di formashon aki ta: Guitara, Bass, Piano, Perkushon, Trompèt i Trombon.
E intenshon ta pa e lèsnan aki kuminsá medio luna di mei i ta p’esei ta urgi tur esnan interesá pa inskribí pa mas tarda 30 di aprel, mandando un WhatsApp na +5999 563-6368 i ei lo bo risibí e link kaminda bo ta yega e formulario. E formulario ta e google form aki https://forms.gle/ajVsDVkfqBRK34Tw8
Si den kaso ku Direktiva di AMAK logra haña mas donashon for di komersio, tin hasta posibilidat pa e kursonan bira grátis.
Importante ta pa inskribí pa bo forma parti di e trayekto aki. Kòrda bon ku e método ku AMAK ta usa ta unu hopi efisiente i ta notabel kon eksitoso esnan ku a sigui e formashon musikal di AMAK ta dunando fruta den farándula di Kòrsou.
Atentamente
Direktiva di AMAK