Women’s Steering Committee Curaçao: “Nos tur tin un responsabilidat pa konservá i salbaguardiá nos monumentonan”
Women’s Steering Committee Curaçao: “Nos tur tin un responsabilidat pa konservá i salbaguardiá nos monumentonan”
WILLEMSTAD – Dia 18 di Aprel gran parti di mundu a selebrá Dia Internashonal di Monumento i Sitionan Históriko. Un variedat amplio di aktividat a tuma lugá riba e dia spesial aki ku e ophetivo pa oumentá konsientisashon pa konservá monumentonan i sitionan históriko. Organisashonnan manera Nashonnnan Uní ta empoderá opservashon i selebrashon di e ‘dia’. “Nos pais ta riku na monumentonan úniko i tambe sitionan ku un balor históriko,“ sra. Mirieta Lourens – de Lanoy, presidente di Women’s Steering Committee Curaçao a bisa.“Nos kada un, tantu komo individuo, i komo organisashon, tin un responsabilidat pa konservá i salbaguardiá nos monumentonan i sitionan históriko. Organisashonnan gubernamental, partikular i NGO’s mester traha dirigí pa lanta e balor propio den nos komunidat pa konservá nos monumentonan i legado históriko,” e presidente di WSCC a sigui bisa.
“Nos ta di opinion ku nos gobièrnu mester tuma un ròl muchu mas prominente komo ehèmpel den esaki. Na muchu hopi okashon nos ta tuma nota ku organisashonnan gubernamental i semi-gubernamental ta hür edifisionan komersial pa sirbi komo sitio kaminda empleadonan mester ehersé nan trabou, miéntras ku ta laga edifisionan monumental deteriorá. Meskos ta konta tambe pa empresanan. Den mes rosea nos ta bisa di ta tuma nota tambe ku monumentonan ku a nombra na nos baluartenan tambe ta den estado di deterioro. Masha poko ta hasi na mantenshon i hopi biaha nos mes hendenan ta hasi destrukshon. Esaki komo konsekuensia ku no a dediká sufisiente na konsientisá i lanta e balor propio serka nos hendenan,” sra. Lourens – de Lanoy a sigui bisa. “Organisashonnan di tur índole mester duna di nan parti pa esaki. Por hasi esaki organisando diferente workshop, seshon informativo, charla kaminata, i ekskurshonnan ku ta programá algun bes pa aña pa empleadonan. Pa loke ta nos hubentut nos ta di opinion ku nos komo mayor i tambe skolnan mester dediká mas atenshon na informá, konsientisá i lanta e balor propio.”
Mester lanta e sentido di orguyo den nos komunidat pa nos monumentonan ku ta warda partinan bunita di nos historia i kultura. Nos tin monumentonan úniko, motibu pa kua entre otro nos sentro di siudat ta ser rekonosé komo patrimonio históriko mundial. Kada paso i akshon ku nos tuma, pa salbaguardiá nos legado i herensia kultural, sea tangibel, òf no-tangibel, nos mester mira komo un forma pa lanta e balor propio den nos komunidat i un aporte na desaroyo di nos komo pueblo ku ta stima su nashon. Tin trabou pa nos tur den esaki. Ban traha serio na realisashon di e vishon,” Sra. Lourens, na nòmber di direktiva di WSCC, a klousura bisando.
