MOLÈSTER DI AWA DEN ÁREA DI BÁNDABOU

WILLEMSTAD – Awe mainta, 4 di mei, a konstatá ku mas ku 50 mm di awa a kai den e área di Bándabao a konsekuensia di e awaseru kontinuo ku a kai for di den oranan di mardugá, prinsipalmente den e área wèst di Kòrsou. Esaki a kousa daño i molèster na Sta. Cruz, Lagun, Tera Kòrá, Barber i Pannekoek. Den área di Hòfi Mango, polis mester a duna asistensia na un famia. No tin mas kaso menshoná por lo pronto. Outoridatnan ta tira bista riba estado di damnan den besindario.

For di djabièrnè último, Servisio Meteorológiko a pronostiká ku hopi awa tabata na kaminda. Pa awe e menasa inmediato di molèster di awa a baha. No opstante esaki, ta pidi tur hende pa sigui e mensahenan di Servisio Meteorológiko pa motibu ku, den e dianan ku ta sigui, mas awa por kai den montantenan bastante grandi ku por kousa molèster. Esaki ta e kaso pa Bándabao i pa Bándariba.

Servisio Meteorológiko por laga sa mas òf ménos tres ora adelantá den kua área awa lo kai. Si e mésun montante di awa ku a kai na Bándabao awe lo a kai na Bándariba, lo ta bai tin hopi molèster pa e parti p’ariba di nos isla. P’esei ta importante pa tur hende tuma tur e medidanan nesesario pa protehá su kas, besindario, famia i bestia. Alabes ta pidi tur hende pa no bishitá e playanan parti wèst di Kòrsou i pa evitá subi terenonan na Bándabou kaminda e tera por sak, pa motibu di awa eksesivo ku ta buska kaminda pa laman.

Tim di Krísis a reuní na Fòrtí pa vigilá e situashon andando i lo sigui monitoriá kada desaroyo den e dianan benidero.