Women’s Steering Committee Curaçao ta selebrá Dia Internashonal di Famia rindiendo tributo na union den famia

Komunikado di Women’s Steering Committee Curaçao den kuadro di Dia Internashonal di Famia – 15 di Mei 2024

Women’s Steering Committee Curaçao ta selebrá Dia Internashonal di Famia rindiendo tributo na union den famia

Willemstad – Women’s Steering Committee Curaçao ta felisitá e komunidat di Kòrsou ku Dia Internashonal di Famia. E ‘dia’ ta un oportunidat ideal pa empoderá e ròl importante di famia pa nutri amor i promové union den famia. “Riba Dia Internashonal di Famia nos ta selebrá e importansia di union den famia i ta suprayá tambe e importansia pa sostené otro den tempu bon, tempu di reto i atversidat. Awor, mas ku nunka, ku nos tin di enfrentá hopi reto i inseguridat. Union den famia mester fortifiká nos resilensia. E mester sirbi alabes pa fomentá speransa, fe i solidaridat,” sra. Lourens – de Lanoy, presidente di Women’s Steering Committee Curaçao a bisa.

“Un famia uní por atendé mihó ku tur atversidat i retonan di e bida di awendia. Miembronan di famia mester sostené otro i forma un kadena sólido pa por enfrentá retonan i atversidat. Den e núkleo di famia mester tin un kompromiso profundo pa sostené otro pa huntu traha riba bienestar di kada miembro di famia. Por hasi esaki ku muestra di empatia i krea momentunan di  ‘legria huntu. Famianan mester radia atenshon, kompashon i akshonnan di kuido pa otro. Dia Internashonal di Famia, ta brinda nos un oportunidat pa re-firmá e kompromiso pa sostené otro i stimulá relashon armonioso den famia,”Sra. Lourens – de Lanoy a sigui bisa.

“Ku selebrashon di Dia Internashonal di Famia, nos di Women’s Steering Committee Curaçao, ta enkurashá famianan pa dediká e dia pa reflekshoná riba e importansia di union den famia i alabes ekspresá gratitut p’e amor i sosten ku ta risibí di kada miembro di famia. Laga nos apresiá kada momentu di atenshon i disfrutá di kada momentu ku ta eksperensiá huntu.”

“Den e espíritu di union i kompashon, Women’s Steering Committe Curaçao, ta deseá tur famia di nos bunita komunidat un dia yená ku dicha i grato memoria. Ban sigui traha huntu, for di un base sólido di famia, riba un komunidat den kua ta reina amor, union i empatia pa otro. Nos mihó deseonan riba Dia Internashonal di Famia.”