Mas preokupashon serka e institutonan finansiero tokante atake digital
Mas preokupashon serka e institutonan finansiero tokante atake digital
WILLEMSTAD/PHILIPSBURG — Atake kontra sistema di informashon (atake digital òf
sibernétiko) a bira e tipo di riesgo ku mas ta preokupá e institutonan finansiero. Asina Centrale
Bank van Curaçao en Sint Maarten (CBCS) ta menshoná den su Informe di Stabilidat Finansiero
(FSR) pa 2024. E institutonan finansiero di nos union monetario ta oumentando nan esfuerso-
i invershonnan pa hasi nan sistemanan mas resistente kontra e tipo di atakenan akí.
Den e último añanan, e institutonan finansiero den Karibe ta enfrentando mas atake digital i
interupshon di nan sistemanan digital. Den algun kaso, esei a okashoná daño finansiero grave i a
suak konfiansa di públiko den sistema finansiero. E institutonan finansiero lokal ta indiká ku nan ta
preokupá kada bes mas tokante e menasa di atake digital. Pa kombatí e menasa kresiente akí,
mayoria di e institutonan ta hasiendo invershon kuantioso den siguridat di IT.
CBCS a pone ‘cyber resilience’, esta, resistensia kontra atake digital, komo un punto sentral riba su
agènda stratégiko i ta elaborando un plan di paso pa mehorá siguridat digital di e institutonan
finansiero bou di su supervishon. Meta di e plan di paso ta pa fortifiká e sistemanan di maneho di
kontinuidat operashonal di e institutonan, pa asina nan por rekuperá mas rápidamente den kaso
di un atake. A aktualisá e dokumento Provisions and Guidelines for Business Continuity
Management konforme e norma ISO22301:2019. Próksimamente, lo publiká e dokumento
Provisions and Guidelines for Cyber Security i lo organisá training pa e institutonan ku ta bou di
supervishon di CBCS. I unabes ku e promé fasenan di e plan di paso ta tras di lomba, CBCS lo
introdusí ‘stress test’ pa yuda identifiká e vulnerabilidatnan di e institutonan finansiero riba tereno
di siguridat digital.
CBCS ta publiká e informe FSR ku e meta di informá públiko tokante estado di e sistema finansiero
di e union monetario di Kòrsou i Sint Maarten. E institutonan finansiero ta enfrentando kada bes
mas riesgo relashoná ku eskalashon di konflikto geopolítiko i desaroyo di e merkadonan finansiero
na nivel mundial. E bankonan, fondonan di penshun i kompanianan di seguro ta sigui vigilá e
riesgonan ku nan ta enfrentá, manera kalidat di aktivo, instabilidat di preis riba merkado i oumento
di gastu di reaseguro debí na kambio klimátiko. En general, sektor finansiero ta sigui demostrá di
ta resistente i adaptabel.
Pa mas informashon tokante estado di sektor finansiero na Kòrsou i Sint Maarten, CBCS ta invitá
bo pa konsultá e último informe FSR riba su wèpsait, na:
https://www.centralbank.cw/publications/financial-stability-reports/2024.
Willemstad, 24 di mei 2024
CENTRALE BANK VAN CURAÇAO EN SINT MAARTEN
