KRIOYO FILM FESTIVAL DEN CARIBBEAN CINEMAS NA SAMBIL

Durante 1 siman largu ku pelíkula na Papiamentu:

KRIOYO FILM FESTIVAL DEN CARIBBEAN CINEMAS NA SAMBIL

 

Nos hendenan lokal Ku sosten di Ministerio di Desaroyo Ekonómiko enkabesá pa Minister   Sr. Ruisandro Cijntje, i tambe Komisionado di Pelíkula na Kòrsou Sra Elouise van Wickeren ayera durante un rueda di prensa a tuma lugá lansamentu di e proyekto Krioyo Film Festival 2024. E festival aki ta konta tambe ku sosten total di  Caribbean Cinemas i  di Sambil shopping mall.

Kòrsou lo bai konosé den final di òktober, pa ta eksakto 28 òktober te 3 novèmber, un siman largu di pelíkula kompletamente na papiamentu.  Nos ta rèfri aki na e promé edishon di Krioyo Film Festival (KFF) , kaminda durante 1 siman largu  pueblo di Kòrsou ta haña e oportunidat pa disfrutá di produkshonnan lokal na papiamentu di sineastanan di Kòrsou, Aruba i Boneiru, pero mas interesante ainda, ku nos mes aktornan riba pantaya grandi.

Nos tur ku a lanta i konosé West-End, Roxy, Cinelandia i te hasta un Cine Rio i ta kòrda kon por a mira pelíkulanan Merikano, Mehikano, Chines djis pa nombra algun. Vários ta e pelíkulanan ku nos hendenan a yega di traha, pero ku e generashon aktual no konosé. Banda di esei, tin pelíkulanan nobo ku na e momentunan aki ta trahando riba dje.

E Festival di Pelíkula Krioyo ta sirbi komo un plataforma vibrante pa sineastanan, kontadónan di historia, i kreativonan ku ta traha den e historia  kultural di Papiamentu.

Nos tin komo meta pa selebrá e ekspreshonnan kultural úriko, narativanan, i vishonnan artístiko ku surgi for di e islanan di ABC. Dor di pone énfasis riba pelíkulanan produsí na Papiamentu pa asina nos ta honra e herensia lingwístiko i kultural di nos region.

E festival ta brinda un espasio pa kolaborashon, interkambio di konosementu, i networking entre sineastanan. Tantu si bo ta un talento skondí òf un produktor establesí, Festival di Pelíkula Krioyo ta simulá diálogo, partnership, i  kompartí konosementu pa otronan tambe por siña.

Kurason di e festival ta den su proyekshonnan di Pelíkula. Lo selektá un variedat di pelíkulanan produsí na Papiamentu, kubriendo diferente Género, temanan i formatonan. For di pelíkula chikí pa narativanan largu, kada obra ta kontribuí na e kolónan vibrante di nos identidat kultural.

E festival ta brindá amplio oportunidatnan pa networking. Produktornan, direktornan, aktornan, i miembronan di diferente ekiponan di filmashon, por konektá, kompartí eksperensianan, i eksplorá kolaborashonnan potensial.

Tambe lo bai tin aserkamentu di proyekshonnan na skol, i diskushonnan ku estudiantenan ta fomentá un komprondementu mas profundo di produkshon di Pelíkula i representashon kultural. Krioyo Film Festival lo aserká skolnan avansá i sigur e klasnan ku ta duna e materia di Papiamentu, pa nan tambe por wak e pelíkulanan aki na un preis spesial den dia.

KFF lo anunsiá den medionan di komunikashon i medionan sosial fechanan pa inskripshon i naturalmente tur otro detaye rondó di e partisipashon na Krioyo Film Festival 2024.

Si tin kualkier pregunta, por yama nos libremente na +5999 6653637

 

Atentamente

 

 

Krioyo Film Festival