STICHTING ALZHEIMER DI BISHITA SERKA KONSEHO DI MINISTER
MINISTERIO KONSERNÍ ASUNTUNAN GENERAL I PROMÉ MINISTER
STICHTING ALZHEIMER DI BISHITA SERKA KONSEHO DI MINISTER
PUBLIKÁ RIBA 29 MEI 2024
WILLEMSTAD – Riba djárason 29 di mei 2024, Konseho di Minister a risibí representantenan di Stichting Alzheimer Curaçao. Esaki a sosodé riba invitashon di Minister Larmonie-Cecilia den kuadro di duna informashon tokante e fundashon i pa hasi kolèkte.
Stichting Alzheimer Curaçao a keda fundá riba 1 di mart 2000. E fundashon ta konsistí di boluntarionan i tin komo meta prinsipal pa yuda halsa kalidat di bida di e persona ku ta sufri di Demensia/Alzheimer i tambe di su kuidadó.
E fundashon ta hasi vários aktividat. Entre otro ta duna informashon na komunidat via medionan di komunikashon i pa medio di un foyeto, di manera ku por rekonosé e síntomanan i buska yudansa trempan. Riba petishon por duna charla tokante e malesa na diferente instansia (klupnan di dama, empresanan, skolnan, institutonan di kuido etc.).
