E ‘pakete’ di Hak’e Curaçao Summer Festival ta gran faborito Dos anochi elektrisante na kaminda pa Kòrsou
WILLEMSTAD: E dianan ta aserkando pa Kòrsou akudí masalmente na Curacao Airport Venue pa gosa di Hak’e Curaçao Summer Fest. Riba ámbos dia di festival ta importante pa públiko yega trempan di manera ku nan por disfrutá henter anochi. Organisashon di Hak’e ta kontentu di por ofresé e aña aki atrobe e pakete di manera ku tur fanátiko ku ke bai ámbos dia ta spar 75 florin! Nan ta sigur un gran faborito i ta bayendo rápido! Dianan 28 i 29 di yüni próksimo lo tin un goso total ku presentashon di Nicky Jam, Servando y Florentino, Olga Tañón, Tributo Al Merengue feat. Fernando Villalona, Wilfrido Vargas i Kinito Mendez. Tambe, Kòrsou su propio talentonan AxL & Orchestra i NSTYPLY!
Ta premirá dos anochi fenomenal ku ambiente tropikal i ku lo inspirá baile sin stòp. Riba djabièrnè Olga Tañón e diva di merengue lo ta espektakular kantando tur su hitnan. Miéntras Fernando Villalona, Wilfrido Vargas i Kinito Mendez lo presentá un Tributo Al Merengue. Públiko lo ta den espektativa p’e repertorio di AxL & Orchestra! Djasabra ta kasi sold-out pa presentashon di Nicky Jam, Servando y Florentino i NSTYPLY!
‘Orkestanan All Star’ halando bastante atenshon
Riba e promé anochi, dos músiko di taya i di renombre den nan industria ta topa otro kara-kara. AxL Pikero ta topa Yturvides. Kada un tin un tarea grandi; AxL Orchestra a bini bèk riba demanda popular di públiko ku aña pasá a gosa di un presentashon fantástiko di e ‘all star’ bou direkshon di AxL. Na otro banda Yurvides, un di e músikonan internashonal ku anualmente ta partisipá den Tumba. E tin direkshon di e orkesta ‘all star’ ku ta biniendo for di eksterior pa kompañá Wilfrido Vargas, Fernandito Villalona i Kinito Mendez. E orkesta ‘all star’ bou direkshon di Yturvides ta konsistí di 3 músiko di kada kantante/orkesta respektivamente- huntu nan lo ta 16 músiko riba esenario. Públiko lo risibí un poder musikal i presentashon nunka bisto, na unda 3 leyenda di merengue ta topa otro riba esenario.
Karchinan awor ta den e último tanda di benta. Un pakete pa ámbos dia ta 225 florin -nan ta limitá. Karchinan ta optenibel na, Ticketpoint Zeelandia, 24 Uur uit de Muur, Mensings Caminada, Van den Tweel i Vanddis. Pa informashon di VIP sekshon Balcony òf Platinum por tuma kontakto na: +5999-5209700 òf bishitá www.hakecuracao.com
