BAN DUNA ATENSHON NA E MUSIKONAN I ARTISTANAN KU TA KOMPLETAMENTE DEPENDIENTE DI NAN PROFESHON

BAN DUNA ATENSHON NA E MUSIKONAN I ARTISTANAN KU TA KOMPLETAMENTE DEPENDIENTE DI NAN PROFESHON

 

WILLEMSTAD – Direktiva di AMAK durante último dianan tambe a tuma nota di e plagia kontagioso ku ta menasa bida humano rònt mundu. Nos tin ku ekspresá nos sintimentunan di konvivensia ku tur esnan ku a ser afektá pa e Covid 19 aki.

Pa lokual ta trata Kòrsou, nos tambe ta konsiente ku espesialmente e sektor di Horeca a haña un sla formal i kasi ireparabel. Nos ta konsiente ku e medidanan ku Gobièrnu a tuma ta nesesario, pero konsekuensia di esaki, espesialmente esnan ku ta duna servisio ta den un situashon hopi difísil.

Direktiva di AMAK ta apresiá tambe ku tin intentonan serio di profeshonalnan di Gobièrnu ku ta trata di suavisá e sirkunstansianan difísil aki mas tantu difísil.

Direktiva di AMAK ta kontentu di a tende ayera durante un programa radial farandulero, ku Gobièrnu ta studiante e posibilidat pa bai ofresé músikonan i artistanan ku por presentá pruebanan palpabel di e pèrdida di entrada ku nan a sufri, un pakete sosial. Ta bèrdat ku den e mundu farandulero tin diferente músiko ku aparte di ta praktiká músika, ta ehersé un trabou den un of otro empresa.

Esaki ta e gremio ku por soportá e konsekuensianan negativo di e viro aki mas tantu. 

Awe nos ke hasi un apelashon dramátiko riba Gobièrnu di Kòrsou i empresanan, pa ban enbèrdat pa wak kon por realisá un pakete sosial pa e músikonan i artistanan ku ta dependé pa 100% di entradanan, dor di praktiká músika o arte.

Músika semper a proba ku den momentunan difísil ta e medio   adekuado ku pa trese e alivio nesesario. Pues, nos tin ku kontinuá na hasi orashon na Todo Poderoso pa yuda den e situashonnan aki i banda di esei, nos lo por krea espasionan musikal ku tambe lo por duna un alimento positivo.

Por pensa kisas pa ban krea espasionan na espesialmente nos kanalnan di televishon pa laga gruponan musikal den un forma limitá i responsabel, trese músika ku ta inspirá e pueblo pa keda positivo i pa mantené fe i speransa ku nos lo haña un solushon. E espasio aki por ta direktamente na e plantanan di televishon mes pa limitá e gastunan i na e mesun momentu mester por reserva un suma apropiá ku por keda destiná pa e músikonan ku ta full profeshonal.

Finalmente direktiva di AMAK ta deseá pueblo di Kòrsou kompletu i nos músikonan i artistanan forsa na e momentunan difísil aki. Wak den ki forma bo por hasi bon uso di un forma kreativo di e tempu ku bo tin na bo disposishon.

 

Direktiva di AMAK

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: