Olga Tañón ta habri e promé anochi di Hak’e Curaçao Summer Festival Un anochi di baile, goso i merengue!
Olga Tañón ta habri e promé anochi di
Hak’e Curaçao Summer Festival
Un anochi di baile, goso i merengue!
WILLEMSTAD: Nos a drenta e siman kulminante di Hak’e Curaçao Summer Festival. Djabièrnè awor públiko lo gosa di un anochi ku merengue di ‘oro’. Hitnan ku a dominá radio emisoranan den dékada 80 i 90 lo zona ora ku Tributo Al Merengue feat. Fernando Villalona, Wilfrido Vargas i Kinito Mendez zona den Curaçao Airport Venue. Públiko lo ta den espektativa p’e repertorio di AxL & Orchestra tambe.
Riba ámbos dia di festival ta importante pa públiko yega trempan di manera ku nan por disfrutá henter anochi. P’e fanátikonan di Olga Tañón, ta importante pa tene kuenta ku e ‘Diva di Merengue’ ta habri festival; esaki ta programá pa 20:45. No basilá, sòru pa bo tei trempan di manera ku bo por ubiká bo mes te dilanti di esenario!
Olga Tañón lo ta elektrisante:
E ta yega Kòrsou despues di kasi 10 aña, i a konosé un transformashon total. Riba e anochi aki Olga Tañón lo kanta tur su hitnan. E ta aktualmente den un gira sumamente eksitoso bishitando e.o Panamá i México, na unda e’la yena diferente arena ku konsiertonan sold-out. Kòrsou tambe lo sá di gosa sin fin! Manera tur hende sá, e aña aki tin 2 sekshon; General i Balcony (VIP). Organisashon a skucha fei públiko i a eliminá e VIP Standing pa krea un área di festival grandi brindando oportunidat na un i tur pa yega serka dje artistanan. Si bo yega trempan, lo bo ta t’e dilanti!
E ambiente di festival:
Tin un foodcourt pa tur esnan ku yega trempan na Curaçao Airport Venue; kome, bebe, sosialisá i antisipá e promé presentashon di anochi. E ambiente di festival ta úniko; na Kòrsou nos gusta mashá, e kana sosialisá, e topa i kòmbersá i finalmente, e dushi músika i un presentashon di kita sombré. E dianan ta aserkando pa Kòrsou akudí masalmente na Curaçao Airport Venue pa gosa di Hak’e Curaçao Summer Festival. Organisashon di Hak’e ta kontentu di por ofresé e aña aki atrobe e pakete pa tur fanátiko ku ke bai ámbos dia. Dianan 28 i 29 di yüni próksimo lo ta tremendo; djasabra ta kasi sold-out pa Nicky Jam, Servando y Florentino i NSTYPLY!
Karchinan awor ta den e último tanda di benta; Djabièrnè Naf 100, Djasabra Naf 150 òf un pakete pa ámbos dia pa 225 florin -nan ta limitá. Karchinan ta optenibel na, Ticketpoint Zeelandia, 24 Uur uit de Muur, Mensings Caminada, Van den Tweel i Vanddis. Pa informashon di VIP sekshon Balcony òf Platinum por tuma kontakto na: +5999-5209700 òf bishitá www.hakecuracao.com
