Pregunta na Ministernan di Salubridat, Medio Ambiente i Naturalesa Sr. J. Silvania òf sr. G. Pisas i Minister di Tráfiko, Transporte i Planifikashon Urbano Sr. Charles Cooper riba e destrukshon di e vegetashon na Klein Kòrsou ku ta sirbi pa protehá e nèshinan di turtuga.

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Kòrsou, 25 yüni 2024

 

Tópiko: Pregunta na Ministernan di Salubridat, Medio Ambiente i Naturalesa Sr. J. Silvania òf sr. G. Pisas i Minister di Tráfiko, Transporte i Planifikashon Urbano Sr. Charles Cooper riba e destrukshon di e vegetashon na Klein Kòrsou ku ta sirbi pa protehá e nèshinan di turtuga.

 

Honorabel sra. America-Francisca,

 

Señora Presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko; ‘Yamada urgente di alerta!!’ na Ministernan di Salubridat, Medio Ambiente i Naturalesa sr. J. Silvania òf sr. G. Pisas.

 

 

Atentamente,

 

 

 

 

Ana Maria Pauletta

Miembro di Parlamento, Partido Alternativa Real

 

 

 

Minister di Salubridat, Medio Ambiente i Naturalesa

Na e minister korespondiente Sr. J. Silvania i  sr. G. Pisas

Colon

Presente

 

Minister di Tráfiko, Transporte i Planifikashon Urbano

Na e Sr. Charles Cooper

Ser’i Ararat, PARSELA C

Presente

 

Kòrsou, 25 di yüni 2024

 

Tópiko: Yamada urgente di alerta!!

 

Apresiabel Minister sr. Silvania, Minister sr. Pisas i Minister Cooper,

 

Resientemente Sea Turtle Concervation Curaçao (STCC) a hasi un yamada urgente i dramátiko di alerta, na momento ku nan a deskubrí ku a destruí parti di e vegetashon na Klein Kòrsou. E vegetashon aki, ta sirbi pa protehá e nèshinan di entre otro e turtuga ‘Hawksbill’.

Kòrsou, spesífikamente Klein Kòrsou ta un di e lugánan skohé pa e turtuga ‘Hawksbill’ pa pone su webunan. Esaki danki pa e kondishonnan favorabel ku ainda nos ta konosé. E turtuga ‘Hawksbill’, meskos ku e turtuga bèrdè ta riba e lista internashonalmente di ekstinshon. E echo ku e turtuganan aki, ta skohe Kòrsou, pa añanan kaba, komo nan lugá pa pone webu, mester duna nos un sentido di honor i orguyo. Ku Kòrsou, komo isla chikí den mundu, ku potensial enorme, por forma parti di e ret internashonal di protekshon di espesienan di turtuga.

E echo ku na Klein Kòrsou ta kita vegetashon, ku ta fungi komo protekshon di e nèshi di e turtuga, ta peligrá e produkshon di webu. Pero ta impliká tambe ku den futuro e turtuga ta skohe otro kaminda pa pone su webunan. Lokual tambe tin konsekuensia pa e turtuga, ku ta un animal di kustumber, na momento ku e skohe un kaminda pa pone webu, einan nan ta mantené komo nan lugá sigur.

Danki na e tratado di RAMSAR, Klein Kòrsou a keda dekretá komo un teritorio di importansia  internashonal. Esaki por gran parti pa e presensia e turtuganan. Esaki ta un yamada urgente di alerta na tantu e ministernan di GMN, komo esun di VVRP pa ban pone atenshon na loke ta pasando na Klein Kòrsou. Protekshon di Klein Kòrsou, ta protekshon di e animalnan i nos bon nòmber internashonal.

 

 

 

A base di e puntonan trese dilanti, suskrito tin e siguiente preguntanan:

1. Minister di GMN i VVRP a tuma nota di e yamada di alerta di STCC? Kua ta e akshonnan konkreto ku minister(nan) a tuma den kuadro di esaki?
2. Minister GMN por informá Parlamento, e estado di e plan pa Klein Kòrsou, ku a inisiá na aña 2023 ku fondonan di Union Europeo, ku lo a finalisá aprel 2024? E plan pa yega na akshonnan konkreto, ku ta kumpli ku e tratado di RAMSAR.
3. Minister VVRP lo por informá Parlamento si ainda tin un moratorium di konstrukshon riba Klein Kòrsou? For di tempu ku Minister Cooper a dekretá un moratorium, tabatin konstrukshon i/òf intento riba Klein Kòrsou?
4. Minister di VVRP por informá Parlamento ki dia tabata e último bishita di supervishon di VVRP na Klein Kòrsou i kua tabata e estado di Klein Kòrsou durante e kontròl ei ?

 

 

Danki di antemano,

 

 

Ana Maria Pauletta

Miembro di Parlamento, Partido Alternativa Real