Un gran baluarte musikal Selsio Pieters a bai laga nos

 

Un gran baluarte musikal Selsio Pieters a bai laga nos

Willemstad – Direktiva di AMAK a tuma nota di e notisia tristu ku Selsio Pieters, den boka di pueblo Gai Sè ya no ta huntu ku nos mas riba e mundu aki.

Manera den hopi di esnan ku a relatá tokante e gran pèrdida aki, Selsio Pieter tabata un músiko ehemplar, profeshonal i  hopi serio den su trabou.

Selsio Pieters ta un di e musikonan ku a marka historia pa e echo ku el a popularisá e Original Músika Kubano, esta Son Montuno i krea un  variante  musikal konosí den nos pueblo komo e ritmo di Kòmbèk.

For di komienso di su karera musikal  den gruponan manera Blue Swining Combo, Combo Magnifico, Grupo Tres i otro nan, el a pone su stèmpel komo un músiko profeshonal ku  un habilidat tékniko hopi grandi.

Selsio Pieters tambe a papia un temporada na Hulanda i aya tambe el aktua ku diferente agrupashon musikal den e género di kòmbèk.

Despues di su regreso na su pais natal, Selsio Pieters semper a bria den su forma di dirigí agrupashonnan musikal na un nivel hopi haltu.

Algu masha positivo di e gran personahe aki ta su manera sosial ku e tin pa semper ta den kontakto ku no solamente e musikonan, pero tambe ku su fanatikada.

Selsio Pieters último tempu nan aki tabata sufri kebrante di salú i na vários okashon esaki a eksihí tratamentu médiko intensivo. Awor aki Selsio no tin dolor mas i nos ta konvensí ku den Reino Selestial ya kaba e ta gosa di un felisidat eterno.

último 10 aña, Selsio Pieters a forma parti di e agrupashon musikal S.O., kaminda tambe el demostrá su nivel musikal.

Finalmente, direktiva di AMAK ta ekstendé palabranan di forsa na famianan, na tur integrante di e agrupashon musikal S.O. i na farándula lokal i na pueblo en general pa nos pasa e momentunan difísil aki, kaminda nos ta bai tuma despedida di Selsio Pieters.

Ku su alma sosegá na pas.