Mirando e espektativanan di merkado finansiero internashonal CBCS ta baha su tasa ofisial

 

WILLEMSTAD/PHILIPSBURG — Centrale Bank van Curaçao en Sint Maarten (CBCS) a tuma e
desishon di fleksibilisá su maneho monetario aktual, bahando su tasa di interes ofisial ku 0,50
punto porsentual te 5,25%. A yega na e desishon akí mirando ku tantu e posishon di divisa
komo e kobertura di importashon di nos union monetario ta sólido i stabil i ku ta premirá un
bahada den e tasa ofisial di Reserva Federal Estadounidense (Fed). No opstante, CBCS su
Komité di Maneho Monetario (MPC) lo sigui vigilá e desaroyonan ekonómiko doméstiko i
internashonal djaserka, prinsipalmente e indikadónan prinsipal di su maneho monetario, i
ahustá esaki si ta nesesario.
‘Segun e proyekshon di mas resien, e défisit riba kuenta koriente di balansa di pago di e union
monetario lo baha di 15,8% di PIB na 2023 pa 13,9% na 2024, prinsipalmente debí na un oumento
den transferensia koriente neto for di eksterior’, segun direktor ehekutivo di CBCS, dr. José Jardim.
Eksportashon neto lo keda práktikamente na e mesun nivel ya ku, aunke tin un oumento den
eksportashon di produkto i servisio, e subida den kosto total di importashon lo kanselá esaki su
efekto. ‘Konsistente ku e oumento den aktividat turístiko durante 2024, ta proyektá un oumento
den entrada di divisa for di turismo i servisio di transporte na ámbos pais di e union monetario. Pa
loke ta trata e oumento den importashon proyektá, esaki ta ser impulsá prinsipalmente pa un
oumento den importashon di merkansia, prinsipalmente den sektor di komèrsio por mayor i por
detal, reflehando un subida den gastu di turista i den demanda doméstiko na ámbos pais. Ademas,
e invershonnan privá ku ta andando na Kòrsou i Sint Maarten lo hiba na oumento den importashon
di merkansia di parti di sektor di konstrukshon i di utilidat”, Jardim a splika.
Den e promé ocho lunanan di 2024, reserva ofisial bruto a oumentá ku NAf.168,2 mion. E oumento
akí ta prinsipalmente debí na transferensia di fondo for di eksterior i e echo ku tabatin benta neto
di divisa ku Banko Sentral di parti di e bankonan komersial. E transferensianan di fondo for di
eksterior tabata di Banko Mundial pa rekonstrukshon di Sint Maarten, di algun fondo di penshun i
di dos ministerio hulandes: ministerio di Asuntu Interno i Relashon den Reino i ministerio di
Finansa. Sin embargo, e oumento den reserva di divisa a ser moderá pa e retironan di saldo na
dòler di parti di e bankonan komersial (inkluso banko na Boneiru), i algun transferensia pa eksterior
di parti di otro instituto finansiero. En bista di lo anterior, ta premirá un oumento den reserva ofisial
bruto na 2024, ya ku e finansiamentu eksterno i e transferensianan di kapital proyektá lo ta mas
haltu ku e défisit riba e kuenta koriente di balansa di pago.
Kobertura di importashon a subi, di 4,6 luna na fin di 2023 pa 4,8 luna na fin di ougùstùs 2024,
impulsá pa e oumento den reserva ofisial bruto i moderá pa un oumento leve den e importashon
proyektá di produkto i servisio. Ta premirá ku e kobertura di importashon promedio proyektá pa
henter aña lo yega te 4,7 luna, loke ta kómodamente mas haltu ku e norma di tres luna. Por lo
demas, te ku fin di ougùstùs, likides di e bankonan komersial, midí a base di saldo di nan kuentanan
koriente na CBCS, a baha ku 15,2%, impulsá prinsipalmente pa retiro neto di saldo na dòler na
Banko Sentral, e oumento den e reservanan obligatorio i un kompra neto di sertifikado di depósito
(CD).
Despues di e oumentonan fuerte den tasa di interes den 2022, e oumentonan mas moderá den
2023 i un periodo sin kambio for di yüli 2023, parse ku e momento ta yegando pa Fed redusí su
tasa ofisial pa di promé bes atrobe. Mirando ku kresementu ekonómiko i nivel di inflashon ta
bahando, ta premirá ku Fed lo kuminsá redusí su tasa gradualmente, entrante su siguiente reunion
tokante maneho monetario dia 18 di sèptèmber 2024 próksimo. Aunke ainda inflashon ta mas
haltu ku e ophetivo di 2,0%, ta premirá ku Fed lo buska un balansa entre e dos aspektonan di su
mandato: promové un nivel di inflashon moderá i maksimalisá e nivel di empleo (ku ta parse di ta
kresiendo na un ritmo ménos fuerte últimamente). ‘Mirando ku ta antisipá un redukshon den e tasa
di Reserva Federal Estadounidense, ta di spera ku e tasanan di interes riba merkado monetario
internashonal lo kuminsá baha gradualmente. I debí na e tasa di kambio fiho entre NAf. i dòler
estadounidense, un redukshon di e tasa di Fed lo hiba na un bahada den e tasanan di interes di e
union monetario di Kòrsou i Sint Maarten tambe’, dr. Jardim a splika.
‘En bista di lo anterior, CBCS a tuma e desishon di adaptá su tasa ofisial pa di promé bes for di
sèptèmber 2023, redusiendo esaki di 5,75% pa 5,25%. Por lo demas, CBCS lo sigui ofresé sertifikado
di depósito na tasa atraktivo na e emishonnan semanal, pa likides di e bankonan por keda mas
largu riba merkado doméstiko i asina yuda mantené un posishon sólido di divisa’, dr. Jardim a
konkluí.
Willemstad, 16 di sèptèmber 2024
CENTRALE BANK VAN CURAÇAO EN SINT MAARTEN