Minister Plenipotensiario na Washington ta organisá seshon virtual pa hóbennan i profeshonalnan interesá den un karera internashonal

Washington – Minister Plenipotensiario na Washington D.C., Jérôme Beeldsnijder, ta organisá un seshon virtual pa empoderá hóbennan studiante i profeshonalnan di Kòrsou i Aruba, ku ta interesá den un karera regional i internashonal. Sr. Beeldsnijder ta organisá e seshon virtual huntu ku kolega Minister Plenipotensiario di Aruba na Washington D.C., Sra. Zulema Erasmus, Ministerio di Asuntonan Eksterior di Reino i ‘Nationale Coördinator Internationale Functies (NCIF)’.

E seshon virtual ta tuma lugá djárason, 3 di yüni 2026 pa 11.00 AM i 5.00 PM ora di Hulanda.
Por registrá pa partisipá via di e link: https://gobiernu.co/seshonvirtual-NCIF

Durante e seshon virtual lo elaborá riba oportunidatnan pa profeshonalnan di nos islanan pa traha den un organisashon internashonal i kua ta e trayekto ku mester kana. Segun sr. Beeldsnijder, representashon di Yu di Kòrsou den organisashon internashonal i regional, manera Nashonnan Uní, Banko Mundial òf IMF, por tin hopi benefisio pa Kòrsou i desaroyo di nos pais. E trabou ta forma e profeshonal na un nivel haltu, e ta amplia su ret di kontakto, su akseso na ekspertisio lokal, regional i internashonal, su visibilidat i su konosementu. Tur esaki nos profeshonalnan por duna bèk na nos islanan direktamentemente ora nan bini bèk òf indirektamente dor di kontribuí ku ‘mentorship’, konosementu, ‘partnerships’ i mas.

Durante e seshon virtual, sra. Anita Conijn di ‘Nationale Coördinator Internationale Functies (NCIF)’, lo duna un presentashon i tambe, sra, Vanessa van Dijsseldonk, ámtenar di Gobièrnu di Kòrsou lo kompartí su ekperiensia trahando na Nashonnan Uní na Merka.

Klek riba e link pa partisipá: https://gobiernu.co/seshonvirtual-NCIF

---