KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Grupo di kanadónan den naturalesa (hikers) a topa ku un Boa Constrictor na Ser’i Neger

Grupo di kanadónan den naturalesa (hikers) a topa ku un Boa Constrictor na Ser’i Neger

Willemstad – Djamars dia 24 di sèptembèr un grupo di “hikers” ku ta yama nan mes Hbike Outdoor Curaçao a enkontrá un kolebra grandi na Ser’i Neger. A identifiká e kolebra komo un Boa constrictor. A saka portrèt i video ku konsekuentamente a sirkulá riba rednan soshal.

E kolebra aki ku por alkansá kasi 3 meter di largura, a kousa bastante tenshon den komundidat pa motibu ku ya pa hopi aña e espesie invasivo aki a establesé su mes na Aruba i ta kousando un daño ekológiko konsiderabel komo ku e ta kome mamífero chikítu, para, lagasdish i yuana. E populashon di prikichi na Aruba a bai atras di tal manera, ku kasi no ta mira e para aki mas. E kolebra aki ta un “wurgslag” kual ta un kolebra ku ta strangulá kontrali na un “gifslang” ku su djentenan tin venenu ku ta paralisá òf mata su víktima. E kolebra aki por morde hende pero no ta venenoso i no ta forma peliger pa hende si no aserké.

Lamentablemente tin personanan aki na Kòrsou ku ta kria e kolebranan aki na kas. Momentu ku e kolebra aki huí for di su kouchi tin e riesgo grandi ku e por establesé su mes den nos naturalesa i nos lo haña un situashon igual ku na Aruba. Pa evitá ku esaki ta sosode, djaweps último, Ministerio di GMN a mobilisá un grupo di aproksimadamente 20 persona pa trata na lokalisá i fangu e kolebra aki. E grupo tabata konsistí di empleado di Ministerio di GMN, Direktor di CARMABI i miembro di grupo di hikers ku konosé e área hopi bon. Minister enkargá ku sektor di Agrikultura, Medio Ambiente i Naturalesa, señor Gilmar Pisas, tambe a forma parti di e grupo.

Apesar di tur esfuerso i investigashon ekstenso no por a lokalisá e kolebra. Ministerio di GMN ta informá tur siudadano ku ta òf tin pensá pa kria e animalnan aki door di trese nan Kòrsou di forma ilegal, ku e animalnan aki ta forma un riesgo i peliger hopi grandi pa nos fauna. Na Florida na Merka i na Aruba e animalnan aki a hasi hopi daño na naturalesa i por sòru pa eksterminio di vários espesie. Esaki komo ku riba nos isla no tin animalnan ku ta kome e Boa òf e webunan pa mantené balansa natural. Un suplika ta bai na tur siudadano pa porfabor, no importá òf trese e animalnan aki Kòrsou.

GMN ta keda hasi su esfuerso pa por lokalisá e Boa i lo keda bishitá e área. Kualkier persona ku señalá e Boa aki porfabor tuma kontakto ku GMN riba number 522 0224 òf via email ku nos speshalista di naturalesa javier.diaz@gobiernu.cw.

 

 

639114718427035"
639114718427035"