PARTIDO MEP TA LANSA PROME CANDIDATO NOBO
Partido MEP:
PARTIDO MEP TA LANSA PROME CANDIDATO NOBO
Y ta yama bon bini na Erwin ‘Wino’ Lopez na e gran famia di MEP
Dialuna atardi 30 di september na Cede di MEP na Santa Cruz, Partido MEP a lansa e prome candidato nobo riba e lista victorioso pa Eleccion 2024 cu lo tuma luga dia 6 di december proximo. Señor Erwin Lopez, miho conoci como Wino, ta esposo y tata di tres yiu. Señor Lopez ta bin di un famia di educadornan, yiu di juffrouw Mani Lopez, kende a inculca den Erwin e pasion pa enseñansa ya for di tempo cu e tawata chikito. Señor Lopez ta maestro di scol y pa e ultimo añanan a fungi como director di scol.
Señor Lopez ta motiva pa sigui aporta na Aruba riba e tereno di enseñansa, e biaha aki den politica pa traha pa mas mehoracion ainda den enseñansa cu nos a conoce e ultimo 3 aña di gobernacion di Gabinete Wever-Croes. Minister Endy Croes como e mandatario di enseñansa, cu determinacion pa cumpli cu su vision pa enseñasa, a logra cosnan grandi, y cu profesionalnan den enseñansa manera señor Lopez, lo logra hopi mas den e proximo gobernacion di MEP.
“Mi ta uni mi mes na e movecion di MEP pasobra MEP ta pone enseñansa move den direccion na unda tur mucha y hoben ta haya oportunidad pa sigui studia. Mi pasion semper ta y lo keda enseñansa y mi kier uni na e ekipo cu ta traha duro den tempo bon y tempo menos bon, ta yega na solucionnan concreto pa Aruba, sigui innova den enseñansa, sigui apoya nos maestronan, y ta sigui inverti den nos scolnan. Como educador, mi a yuda hopi alumno den mi tempo y awo ta momento pa mi sigui aporta pero pa henter ARUBA”, señor Lopez a expresa durante su lansamento como candidato nobo riba e lista victorioso di e prestigioso Partido MEP.
Den nomber di Partido MEP, Lider di MEP, Evelyn Wever-Croes ta yama bon bini na Señor Erwin Lopez den e gran famia di MEP.
