UN BIAHA MAS PARTIDO MEP A CONTA CU UN ENCUENTRO DI BAN TOPA EXITOSO
Partido MEP:
Danki na e bario di Savaneta pa nan participacion
UN BIAHA MAS PARTIDO MEP A CONTA CU UN ENCUENTRO DI BAN TOPA EXITOSO
ORANJESTAD – Diamars anochi, Partido Movimiento Electoral di Pueblo (MEP) a organisa un exitoso Ban Topa den Savaneta. Ban Topa ta un evento cu partido MEP a cuminsa cu ne na aña 2023, y debi na e exito rotundo a continua cu ne den 2024. E meta di e encuentro aki ta pa candidatonan riba lista, encontra cu habitantenan di e bario cu nan ta representa, pa asina comparti informacionnan valioso y duna nan e oportunidad di haci pregunta.
Durante e encuentro di Ban Topa na Savaneta, partido MEP a presenta 3 candidato nobo cu a uni nan mes na e lista di MEP, y lo ta participando na eleccion electoral december proximo. E tres candidatonan aki, hunto cu Rodymar Geerman y Rocco Tjon lo representa e bario di Savaneta. Tres dama, Natalie Geerman, Shirley Rafini y Marceylaine Paskel.
Despues di e videonan di introduccion a sigui cu e presentacionnan, na unda Natalie Geerman, Rodymar Geerman y Rocco Tjon a sa di duna hopi informacion importante y relevante. Por ultimo a duna su presentacion, lider di partido Evelyn Wever-Croes cu tambe a comparti hopi informacion importante, incluyendo e 7 puntonan di prioridad pa pais Aruba, cu partido MEP lo enfoca riba dje.
E anochi aki, mescos cu tur otro evento di “Ban Topa”, a conta cu un Cebtro di Bario Savaneta completamente yen. Esnan presente a haci varios pregunta y sugerencia, pero alabes a duna aplauso na tur e logronan di e gobierno actual. Partido Movimento Electoral di Pueblo MEP ta gradici e bario di Savaneta pa nan participacion.
