Djabièrnè 8 i djasabra 9 di novèmber 20 artista lokal i internashonal lo ta huntu na Kòrsou pa Rejoice Worship Festival
Djabièrnè 8 i djasabra 9 di novèmber 20 artista lokal i internashonal lo ta huntu na Kòrsou pa Rejoice Worship Festival
Willemstad- HOW Radio 90.9 fm i iglesia House of Worship a tene un interesante rueda di prensa ku artistanan lokal i internashonal ku lo presentá e fin di siman aki na Rejoice Worship Festival. Djabièrnè awor 8 di novèmber i djasabra 9 di novèmber ta e dianan ku hopi ta sperando pa presensiá e gran festival aki ku ta riba nivel internashonal. E festival aki ku dos ensenario super impreshonante, hope station, food court, alabansa i adorashon i un total di 20 artista i banda lokal i internashonal, ta pinta di bira un festival di gòspel impaktante pa Kòrsou.
Rejoice Worship Festival ta un festival kompletamente grátis pa henter famia ku presentashon di diferente artistanan di gòspel for di Estados Unidos, Hulanda, Colombia, Aruba, Boneiru i Kòrsou. Willy Rodriguez, Angelique Klooster, Proskuneo, Liesella Geertruida-Thomas, Nathan Senchi, Arias Ykwii, Juan Caraballo, Shelomi Doran-Bakhuis, Jeridee “Deetje’ Coco i hopi artista mas lo tei presente pa huntu ku e pueblo di Kòrsou alabá i adorá Dios. Tambe lo tin presentashon di Dance Academy How To Dance, Kids United i Muchanan Balente College. Ambos dia e festival ta tuma lugá riba parkeerplaats di iglesia House of Worship, kuminsando for di 7’or di anochi. Portanan lo habri for di 6’or di atardi.
Durante di e konferensia di prensa Raimy Jonathan Juliet ku ta e vishonero tras di e festival aki a splika ku e idea a nase for di un vishon di Dios pa trese pueblo di Kòrsou huntu pa halsa Dios kreando unidat, komunion i transformashon. Howradio 90.9 fm komo un radio modèrno ku ta kompartí e mensahe di speransa i planta positivismo rònt Kòrsou pa medio di su programashon i musiká variá ta sumamente orguyoso di por brinda e pueblo di Kòrsou un festival di e magnitut aki i grátis pa henter e pueblo di Kòrsou.
Durante e konferensia di prensa Juan Carraballo for di Colombia a hiba palabra ekspresando su gratitut i entusiasmo di por ta aki na Kòrsou pa promé biaha. Mientras Arias Ykwii for di Estados Unidos ta kontentu di por tei pa segundo biaha pa forma parti di loke Dios ta bai hasi riba pais Kòrsou. Nathan Senchi for di Boneiru i Shelomi Doran-Bakhuis tambe a ekstendé nan invitashon na henter e pueblo di Kòrsou pa presensiá Rejoice Worship Festival i ta enfatisá e balor i impakto ku alabansa i adorashon tin den un komunidat. Ta na nos pa deklará e bondatnan di Dios riba nos pais.
Mas aleu Eunice de Palm-Doran komo parti di e tim organisadó di e festival aki, a hiba palabra i a duna algun informashon importante pa asina hasi pueblo di Kòrsou su eksperensia durante e festival algu tremendo. Lo tin parkeerplaats adishonal ku vigilansia pa outo i un mini foodcourt ku preisnan di famia pa tur presente por disfrutá. Banda di esaki lo tin un hope station kaminda tur ku ta den nesesidat por yega i risibí yudansa i orashon. Tambe lo tin diferente material pa mucha i hende grandi ku por risibí gratuitamente pa asina fortifiká nos fe. Lo tin un espasio designá pa personanan 60+ òf desabilitá, pa asina nan tambe por disfrutá di e festival. Tur esaki ta pa hasi tur presente su eksperensia aun mas agradabel den e presensia di Dios.
Nos ta invitá pueblo di Kòrsou kompleto pa presensiá e magno festival aki djabièrnè i djasabra awor 8 i 9 di novèmber for di 7’or di anochi riba parkeerplaats di iglesia House of Worship, Erosweg 52. Entrada ta grátis.
