Minister Charles Cooper Aqualectra i Seven Seas Group (Seven Seas) resientemente a firma un akuerdo pa konstrukshon di un Planta nobo di awa ku lo ta situá na e parti wèst di nos aeropuerto Hato; referí komo RO- 5 Hato West.

Minister Charles Cooper

Aqualectra i Seven Seas Group (Seven Seas) resientemente a firma un akuerdo pa konstrukshon di un Planta nobo di awa ku lo ta situá na e parti wèst di nos aeropuerto Hato; referí komo RO- 5 Hato West.
Segun planifikashon di Aqualectra, e planta akí lo ta den operashon pa fin di 2026 pa sigui produsí i distribuí e mesun awa puru i di kalidat ku nos tur ta asina orguyoso di dje na Kòrsou.
Djamars, 26 di novèmber, huntu ku minister, dignatario i algun invitado spesial, Aqualectra i Seven Seas a selebrá e logro asina memorabel akí pa e futuro di sostenibilidat pa Kòrsou.
Na luna di ougùstùs di e aña akí, Aqualectra i Seven Seas a firma un Memorando di Entendimentu (MOU) mustrando nan disponibilidat pa sigui negoshá riba realisashon di e proyekto akí.
E kompania Seven Seas a keda skohé pa medio di un destaho públiko ku a tuma luga na luna di febrüari 2024. Seven Seas tin eksperensha ekstenso den konstrukshon i operashon di diferente planta di desalinashon tantu den Karibe komo tambe mundialmente.
E akuerdo ku Aqualectra i Seven Seas a firmá resientemente, ta enserá un akuerdo riba e proyekto pa Build (konstruí), Own (ta doño di), Operate (Operá) and Transfer (Transferí) (BOOT) e planta nobo di awa na Hato West. Nos planta nobo lo bai produsí 25.000m3 i ta sigui usa e teknologia di desalinashon (‘Reverse Osmosis’) ku ya pa basta aña ta wòrdu uzá na Kòrsou pa purifiká nos awa di laman i hasi esaki un awa di bebe konfiabel i di primera kalidat.
Konstrukshon di e planta nobo di awa na Hato Wèst, ta habri espasio pa e lokalidat aktual na Mundu Nobo por keda usá pa entre otro invershonnan turístiko i komersial den futuro. Defakto, Aqualectra poko poko ya a kuminsá ku trabounan di desmantelashon riba e tereno di Mundu Nobo.
Realisashon di e planta nobo di awa na Hato West, ta pone ku Aqualectra lo por sigui garantisa produkshon i suministro di awa riba nos isla den un forma konfiabel i sostenibel.