𝐌𝐢𝐧𝐢𝐬𝐭𝐞𝐫 𝐁𝐨𝐞𝐤𝐡𝐨𝐮𝐝𝐭 𝐚 𝐁𝐢𝐬𝐡𝐢𝐭á 𝐖𝐢𝐭 𝐆𝐞𝐥𝐞 𝐊𝐫𝐮𝐢𝐬

WILLEMSTAD – Den su trayekto di orientashon i konosementu ku sektor di salú, Minister di GMN, sr. Tyron Boekhoudt, a realisá un bishita di introdukshon na Stichting Wit Gele Kruis (WGK), ku meta di haña un bista mas profundo di e servisio esensialnan ku e organisashon aki ta ofresé.

Durante e bishita, minister Boekhoudt a haña informashon amplio tokante kuido na kas, kuido spesialisá, transporte di pashènt i e sosten ku WGK ta brinda na grandinan i otro gruponan ku tin nesesidat di kuido. A papia tambe ku e tim di maneho riba e manera ku e organisashon ta operá, e reto nan ku nan ta enfrentá i e oportunidatnan pa futuro.

E bishita aki ta forma parti di un proseso mas amplio kaminda e minister ta konosé diferente partnernan den sektor di kuido, ku e meta pa fortalesé kolaborashon entre nan i Gobièrnu di Kòrsou.