MAN-PIN ta Revelá Plan Integral pa Kombatí Subida Ekstraordinario di Preis
MAN-PIN ta Revelá Plan Integral pa
Kombatí Subida Ekstraordinario di Preis
Willemstad, Kòrsou – Awe, e kombinashon MAN-PIN a anunsiá su strategia detayá dirigí riba atendé ku subimentu di kosto di bida na Kòrsou i konstruí un ekonomia resiliente, diversifiká pa Kòrsou. E plan aki ta enfatisá un aserkamentu multi-fasétiko, kombiná ku gobernashon responsabel ku invershonnan stratégiko i empoderamentu di komunidat.
Partidonan MAN-PIN ta rekonosé e ròl krusial ku gobièrnu tin den regulashon di merkado i pa sigurá ku Kòrsou ta bira un pais bibabel. Esaki ta enserá implementashon di kòntròlnan efektivo pa prevení oumentonan di preis inhustu i kaminda tin mester, tuma medidanan pa regulá preis di produktonan di promé nesesidat, manera kuminda, awa, koreinte, hür di kas, remedi, tarifanan di transporte públiko i kombustibel.
E promé akshonnan ku MAN-PIN lo tuma durante e promé 100 dianan di gobernashon ta enerá un kòntrol rígido riba preisnan máksimo di fruta i berdura, introdusí protekshon pa peska lokal i stimulá produkshon di karni di galiña i di kabritu lokal. Banda di esei, tur kas di famia ku entrada bou di e nivel di liña di pobresa lo por konta ku un fasilidat di krédito supsidiá dor di gobièrnu pa kompra di kuminda i produktonan di promé nesesidat den tienda i supermerkadonan ku drenta den un akuerdo di norma di preis di esakinan ku gobièrnu. Pa e kasnan di famia ku ta kai den e kuadro aki, tambe lo tuma akshon pa ku norma di preis di hur pa kasnan di famia i eleminá tur komponente ku ta hasi preis di awa, koriente, gas pa kushiná i gasolin karu. Pa sostené esaki, MAN-PIN lo introdusí tambe un Loto pa Bienestar.
Parti di e aserkamentu di MAN-PIN ta pa oumentá e espasio di sen pa gastunan . P’esei MAN-PIN lo bin ku:
- kambio di e sistema di OB pa un sistema di ABB adaptá,
- redusí tarifa di OZB,
- introdukshon di sugartax,
- alsa e nivel di entrada (omzet) pa eksonerá empresanan mikro- i chikí di impuesto riba ganashi i
- krea insentivonan fiskal pa invershonnan produktivo te 250.000 florin.
Un Tarifa di Entrada di Bishitante nobo pa turista lo wòrdu introdusí pa impulsá e entrada di e pais i yuda kubri gastunan pa esnan lokal. Mester nota, ku e oumento di turismo ku por sierto ta bon pa nos ekonomia, tambe ta kontribuí na subida di preisnan riba nos merkado.
Sinembargo, MAN-PIN ta konsiderá ku negoshonan chikí i mediano, ku ta e wesu di lomba di ekonomia, mester haña sosten fiskal di parti di gobièrnu, speshalmente ora ta trata di empresanan ku ta produsí of bende produktonan alimentisio. MAN-PIN lo duna prioridat den remplasá kuminda fresku importá dor di sostené agrikultura lokal, krio di bestia, peska i prosesamentu di kuminda. E inisiativa aki ta diseñá pa krea trabou, spar divisa, baha gastunan di kuido di salú, i promové práktikanan sostenibel. Pa prome biaha den historia di Kòrsou, MAN-PIN lo destiná fondo pa suspsidiá produkshon lokal di kuminda pa asina hasi e sektor di agrikultura, krio di bestia i peska un sektor primario ku ta kontribui realmente. Esaki, lo ta e kaso tambe ku esnan ku ke kontribuí ku produktonan derivá di e sektor, manera hariña di pan, djus, refresko, sous, kondimento, zeta pa kushiná, esta produktonan prosesá, of té i produktonan di wellness.