Inskripshon a habri pa proyekto FORMA Kòrsou Kursonan grátis pa mamanan di 17 pa 40 aña

Inskripshon a habri pa proyekto FORMA Kòrsou
Kursonan grátis pa mamanan di 17 pa 40 aña

Willemstad- ADRA Curaçao ta sumamente kontentu pa presentá su proyekto nobo: FORMA Kòrsou. E proyekto aki ta spesialmente pa mamanan di 17 pa 40 aña ku tin ménos espasio finansiero. Proyekto FORMA, ku ta nifiká “Formashon di Mamanan,” ta diseñá pa ofresé oportunidat nobo i empoderá mamanan entre 17 pa 40 aña pa medio di tayernan edukativo i práktiko, “coaching” individual, aktividatnan atraktivo i grupo di sosten.
E ophetivo prinsipal di e proyekto aki, ku ta kuminsá na mart 2025 i ku lo tin un durashon di 6 luna, ta pa yuda mamanan pa desaroyá nan mes riba diferente aria, sigurá oportunidatnan di entrada, i mehorá nan imáhen propio. Ku e hèrmèntnan aki, partisipantenan lo desaroyá outosufisiensia, haña mas oportunidat i konstruí un futuro briante.
Kursonan ta inkluí temanan manera: kuido personal, beyesa, abilidat di komunikashon i presentashon, solisitá ku éksito, balor propio, di talento pa negoshi, salú mental i físiko, maneho di finansa, komunikashon mayor i yu, arte i hopi mas.
Tur e tayernan lo ta grátis i lo tuma lugá un biaha pa siman na Sentro di Bario Bonam. Un seshon informativo relashoná ku e proyekto aki lo tuma lugá djaluna awor 17 di febrüari pa 7’or di anochi na Sentro di Bario Bonam. E seshon aki lo duna futuro partisipantenan mas informashon tokante e proyekto i lo tin oportunidat pa inskribí.
Pa mas informashon òf pa inskribí, por fabor tuma kontakto na: 524-4687.
Tur mama aki na Kòrsou ta keda invitá pa bini i tuma e promé paso pa un futuro briante pa nan i nan famia. ADRA Curaçao ta gradisí Samenwerkende Fondsen, Oranje Fonds i Kinderpostzegels pa hasi e proyekto aki posibel