Honors Night 2025 – Un anochi di inspirashon i triunfo!

Honors Night 2025 – Un anochi di inspirashon i triunfo!

 

FDOK ta orguyoso di presentá nos “Honors Night 2025”, ku lo tuma lugá dia 6 di aprel próksimo den WTC. Esaki ta un evento eksklusivo dediká na selebrá ekselensia den deporte na Kòrsou!

 

Durante di e anochi di gala aki, nos lo rekonosé nos ikononan di deporte i e atletanan ku a sobresalí durante aña 2024. Lo ta un anochi di inspirashon, logronan i gratitut na tur esnan ku ta kontribuí na desaroyo di deporte riba nos isla.

 

Ken lo ta e grandi ganadornan di e anochi? Na total lo tin 11 kategoria kual ta keda menoshoná aki bou !

 

1. Prospekto hubenil

• Gabriel Eduardo Londono Ruiz ( Curaçao karate bond )
• Katherina Brazil ( Tennis federation Curaçao )
• Akeelah Unika Rojer ( Curaçaose Sòftbòl Bond )

2. Deportista Hubenil femenino

• Keziah Fluonia ( Tennis federation Curaçao )
• Zsa Zsa Hannah Frans ( Curaçaose atletiek bond )
• Sophia Schotte ( Asosashon paso fino Kòrsou )

3. Deportista Hubenil maskulino

• Damir Josue Paulino Francisco ( Curaçao karate bond )
• Zion King Sambo ( Curaçaose atletiek bond )
• Brayden Bridgewater ( asosashon paso fino Kòrsou )

4. Deportista Senior femenino

• Ronelly Marineddys Vos ( Federashon tènis di mesa Kòrsou )
• Ashanty Alexandre ( Curaçaose Sòftbòl Bond )

5. Deportista Senior maskulino

• Phildrick Llewellyn ( Federashon beisbòl Kòrsou )
• Dimitri Nikolai Leon ( Federashon tènis di mesa Kòrsou )
• Yhurisen Aquiles Philoméne Molenaar ( Curaçao Weightlifting Federation )

6. Wes di aña

• Ulrich Hernandez ( Federashon di Tènis di mesa Kòrsou )
• Elfried Laker ( Curaçaose atletiek bond )
• Denzil Philips ( Federashon di ahedrez Kòrsou )

7. Dirigente Tékniko

• Sorick Liberia ( Federashon beisbol Kòrsou )
• Richard Riedel ( Curaçaose atletiek bond )
• Riangelo Da Silva De Goes ( Federashon di ahedres Kòrsou )

8. Dirigente atministrativo

• Jedrek Magdalena ( Federashon Beisbòl Kòrsou )
• Ingrid Enestecia van der Hilst – Melfor ( Federashon tènis di mesa Kòrsou )
• Caimin Christian Douglas ( Curaçaose Atletiek Bond )

9. Ékipo di aña

• Santa Maria Pirates ( Federashon di beisbòl Kòrsou )
• The Eagles ( Curaçaose Atletiek Bond )
• Olympiad Female Chess Team Curaçao ( Federashon di Ahedres Kòrsou )

10. YDK

• Jurickson profar ( federashon beisbòl Kòrsou )
• Jdah Girigorie ( Curacaose Softbol Bond )
• Taqeyah Marcos ( Federashon di Ahedres Kòrsou )

11. Selekshon di aña.

• Selekshon di beisbol senior
• Selekshon di domino
• Curaçao Chess Femele Selection 2024

 

Tambe nos lo introdusí 5 miembro nobo den Salon di fama di FDOK kual ta:

 

1. Franklin Isidro Pascual Veeris ( Body Building )
2. Ulvic Franklin John Jamanika ( karate )
3. Renick Malcolm Jamanika ( karate )
4. Samir Kaled Daou ( Bowling )
5. Grada Maria Gosepa ( Softbal )

 

Ta e intenshon pa durante e dianan benidero nos manda mas informashon di tur e ikononan aki.

 

Nos ta invitá komunidat di Kòrsou kompletu pa bin presensia e prestigioso evento aki.

Sigui nos pa mas detaye i warda pa eksperensia e gala di deporte mas grandi di Kòrsou!

 

CV ULVIC JAMANIKA

 

Ulvic Franklin John Jamanika

 

Durante di un karera impreshonante di mas ku 20 aña Ulvic Franklin John Jamanika tabata na tòp di karate aki na Kòrsou.

 

Primeramente komo un mucha, pa despues subi e trayekto internashonal komo hóben i adulto. Den luna di mart 1982 el a tuma su promé lèsnan di karate serka instruktor Raymond Boutismo na Wado Kai SWRC, ku tabata bou direkshon di sensei Millerson.

 

Despues ku sensei Boutismo na 1988 a bai Hulanda, Ulvic a bai train serka sensei Millerson na Wado Otrabanda. Ya for di 1982 el a konkistá su promé título komo kampion di Kòrsou i esei a sigui durante di masha hopi aña komo hubenil, promé ku el a kuminsá kompetí komo Senior i atrobe na vários okashon el a titulá sea kampion, sup kampion of okupá 3er puesto.

 

Den kompetensianan internashonal: Durante un trayekto di diessinku aña Ulvic na numeroso okashon a figurá den delegashon di karate pa kompetensia internashonal, bringando na e.o. Costa Rica, Venezuela, Pto. Rico, Spaña, Brasil, Chile, Malaysia i vários otro pais.

 

Su promé título internashonal tabata na 1986, na Costa Rica, komo kampion Panamerikano Hubenil. Despues a sigui vários premio den Panamerikano Senior, tambe den Kampionato Sentroamerikano i di Karibe, Kampionato Mundial te ku el a yega na medaya di bròns ku ékipo den Kampionato Mundial na Malaysia i 1e puesto individual den Kampionato Mundial 2001 na Rep. Dominicana komo kampion éstilo Wado.

CV FRANKLIN VEERIS

Franklin I. P. Veeris (17-05-1945) komo deportista a praktiká vários ramo di deporte, pero su éksitonan grandi a konsentrá komo dirigente di body building. Komo deportista e tabata áktivo den futbòl, tènis, karate i sailing, di kua e último aki el a kompetí riba nivel Mundial. Komo dirigente den tènis el a yuda organisá dos torneo grandi (Marlboro Professional Tennis Tournament) i mas despues den body building e.o. Metry Gala Classic.

 

Na edat di 40 aña Frank a kuminsá train deportistanan den fitness i body building despues di a sigui kurso i seminarionan na e.o. New Jersey,  Los Angeles, Miami, New York i Tampa.

 

E preparashon aki a yud’é pa hiba na éksito, inkluso título Sentroamerikano i Karibe. Atletanan manera: Jacqueline Daflaar (1987/88), Anibel Johannes (1988), Fauzi Hanst (1988/89/94/95/97), Nolaika Snijders (1999/2000), Junard Phillips (2002), Nathaniel Veeris (2004) i Lupe Leito (2007/2011).

 

E éksitonan mas grandi ku su atletanan tabata na 1997, ku Fauzi Hanst komo kampion Sentroamerikano i Karibe (C.A.C.) Overall Winner/IFBB Pro Card na Costa Rica, pa despues ripití den 2011 ku Lupe Leito tambe komo kampion C.A.C. i a optené IFBB Pro Card na San Salvador.

Te ku 2012, Frank a entrená i a hiba no menos ku dieskuater (14) bodybuilder na e título komo kampion Sentroamerikano i Karibe.

 

 

 

CV GRADA GOSEPA

Grada Maria Gosepa (29-04-1947) tabata un dje figuranan grandi den selekshon di sòftbòl añanan 70 i komienso di 80.

 

Su start den deporte tabata ku vòlibòl, pero pa motibu di distansia el a stòp ku esei i a bai dediká su mes na sòftbòl kuminsando na edat di 14 aña ku e ekipo di Paradise. Ounke e tabata hungadó di Paradise, Grada tabata risibí invitashon di otro ékiponan pa torneonan internashonal di ékipo, e.o. ku Pichingolo na Maracay, Venezuela, tambe ku Nuevas Estrellas i Blue Bells.

 

Den selekshon di Antia Hulandes tambe el a lusi komo un dje streanan, ku partisipashon den kampionatonan na: El Salvador, Pto. Rico, Venezuela, Rep. Dominicana, Colombia i Cuba.

Na 1976 den CONCACAS, na El Salvador, e ta risibí premio pa mayor kantidat di kareda empuhá i tambe komo honronero. E último aki a inkluí un grand slam kontra di Nicaragua.

 

Su premionan grandi ku selekshon: Medaya di oro ku selekshon kampion invikto den CONCACAS 1971 na San Juan, Pto. Rico. A sigui ku medaya di plata den CONCACAS 1973 na Valencia, Venezuela; bròns ku selekshon antiano den Weganan Sentroamerikano i di Karibe 1974 na Sto. Domingo i medaya di oro den CONCACAS 1976 na El Salvador.

 

Su delaster aparishon ku selekshon tabata den Panamerikano 1982 na Havana, Cuba, kaminda Antia Hulandes a finalisá na di sinku lugá.

Despues di su éksitoso karera komo sòftbolista, Grada a bira skorer i umpire den tantu sòftbòl komo beisbòl.

CV RENICK JAMANIKA

Renick Malcolm Jamanika (26-07-1971) na edat di 10 aña a kuminsá praktiká karate na Klup di Shell, ku e nòmber ofisial Wado Kai Karate SWRC.

 

E tabata kombiná esei ku deporte di siklismo, pero na 1990 mester a skohe konsiderando ku e asuntu di karate a bira algu hopi serio.

 

Rápidamente aki na Kòrsou a kuminsá referi na “rumannan Jamanika”, konsiderando ku su ruman Ulvic tambe tabata grandi den e deporte, miéntras ku den regio tabata yama nan “Hermanos Jamanika”.

 

Ku tempu el a hasi kambio for di Suffisant pa Wado Otrabanda, ku awor ta karga nòmber di Wado Karate William Millerson. For di 1982 te ku 2003 Renick a gana tur sorto di título den e diferente kampionato- i torneonan aki na Kòrsou, tantu pa loke ta trata Kumite (pelea) komo Kata.

 

Su trayekto internashonal tabata di 1989 pa 2003. A start ku oro ku ékipo den kampionato internashonal na Aruba, bròns kategoria -65 kg individual i bròns ku ékipo den Panamerikano na Rio de Janeiro. Oro individual i ku ékipo na Caracas 1991, bròns ku ékipo weganan Sentroamerikano i di Karibe 1993 na Ponce, Pto. Rico; plata individual i tambe ku ékipo den Kampionato Panamerikano 1991 Miami, siguí ku plata individual i oro ku ékipo den Juegos Odesur 1994 na Valencia, Venezuela.

 

Den Mundial di karate 1994 na Malaysia, bròns ku ékipo. Asina a sigui ku mas medaya di oro, plata i bròns na Caracas 1998, Weganan Sentroamerikano i di Karibe 1998, Kampionato Panamerikano 2000 na Chile, Mundial WADO na Rep. Dominicana i Kampionato Panamerikano 2003 na Rep Dominicana.

 

 

CV SAMIR DAOU

Samir Daou (26-05-1971) ta konsiderá komo un dje mihó bowlers, si no ta e mihó bowler ku Curacao Bowling Association (CUBOA) a produsí, tantu na nivel hubenil komo adulto.

 

El a dal su promé pasonan den mundu di bowling na edat di ocho aña i ketu bai ta aktivo dunando training na hóben-i adultonan ku ta deseá esaki.

 

Samir, primeramente, a surgi komo miembro di un famia di beisbòl. Pues su promé movishonnan tabata den e deporte aki. Pero hopi lihé, na edat di 8 aña, el a kombiná beisbòl ku bowling. Kuater aña despues, pa promé biaha, el a titulá kampion di Kòrsou den bowling i despues a sigui no menos ku diestres otro título nashonal.

 

Su promé di hopi premio internashonal a start den 1986 na Mampote, Venezuela, komo sup kampion. Despues a sigui torneonan na Aruba, Costa Rica, Rep. Dominicana, Brasil i otro paisnan. Djis pa menshoná algun: 1987 kampion All Event Tournament Esso Club na Aruba i mesun aña sup kampion Copa Presidente na Costa Rica; 1988 Kampion Junior Single den Lee Evans Tournament of the Americas i den mesun kampionato kampion Mixed Double; 1988, terser puesto torneo internashonal Mampote na Venezuela; 1988 Sup kampion Torneo Internashonal Esso Club, Aruba; 1995 sup kampion Kampionato Panamerikano na Argentina; 2002 kampion Mixed Double Weganan ODESUR na Brasil; 2008 terser puesto Double Men kampionato COBOISCA na Punta Cana, Rep Dominicana, i ala bes 3er puesto Team Men den mesun kampionato. Su delaster título tabata den 2019, di tres lugá Strike Out International Tournament aki na Kòrsou.