Weganan di Rei 2025
Enseñansa, Siensia, Kultura & Deporte
Weganan di Rei 2025
Publiká riba 15 Aprel 2025
WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn a partisipá aktivamente na weganan di Rei di aña 2025. Huntu ku Gobernador sra. Lucille George-Wout, Promé Minister sr. Gilmar Pisas i Minister di Hustisia sr. Shalten Hato a bishitá e promé skol di Direktiva di Skolnan Públiko, kual ta skol di fundeshi Kolegio Tirzo Martha na Buena Vista, pa hasi apertura di e weganan. Despues a sigui ku e di dos skol ku kual ta skol di fundeshi Kolegio Fatima ku ta un skol di Direktiva di Skolnan Katóliko.
E selebrashon di e weganan di Rei ta un inisiativa di Rei Willem Alexander, e weganan aki a inisiá mas ku 12 aña pasá ora a nombra nos Rei. Durante di tur e añanan e aktividat aki ta keda organisá pa sra. Mavis Albertina. E meta di e dia aki ta pa selebrá aña di Rei i ta pone énfasis riba moveshon i kome salú. Tur e alumnonan di e skolnan ku ta partisipá ta risibí un desayuno balansá i despues ta pone enfoke riba moveshon den skolnan.
Minister di ESKD sr. Sithree van Heydoorn durante di e último 4 añanan a pone fondonan na nòmber di Gobièrnu disponibel pa organisá e aktividat aki. Minister ta apresiá e trabounan ku sra. Albertina ta hasi i por mira bèk riba un aktividat eksitoso e aña aki tambe.
Na nòmber di Pueblo di Kòrsou minister Sithree van Heydoorn ta gradisí su ekselensia Rei Willem Alexander, Gobernador di Kòrsou sra. Lucille George – Wout i sra. Mavis Albertina pa nan esfuerso i dedikashon na nos muchanan.
—
sr. Sithree van Heydoorn
Minister di Enseñansa, Siensia, Kultura i Deporte
• Riba e potrètnan athunto por tuma nota di e aktividatnan na apertura di weganan di Rei 2025.
Apertura Weganan di Rei
