Siman pasá sektor di BES di MEO tabata na UN Ocean Conference kaminda mundu a bin huntu pa yega na akshonnan konkreto pa garantisá futuro di nos oséano.
Ministerio di Desaroyo Ekonómiko
Siman pasá sektor di BES di MEO tabata na UN Ocean Conference kaminda mundu a bin huntu pa yega na akshonnan konkreto pa garantisá futuro di nos oséano, ku ta bou di menasa fuerte di kambio di klima, i polushon indusí pa humanonan. Kòrsou komo isla ta dependé di laman pa su desaroyo, i Blue Economy ta un di e enfokenan prinsipal pa garantisá ku nos laman ta proveé nos pa e desaroyo ekonómiko ku nos mester.
Durante e siman na Nice, Fransia, tabatin varios seshon di informashon, i e delegashon di Kòrsou a partisipá komo orador i panelista den varios eventonan ku a tuma lugá na banda di e konferensia. E delegashon tabata konsistí tambe di GMN, Carmabi i Sea Turtle Conservation Curaçao.
E konferensia a finalisá djabièrnè dia 13 ku un kompromiso sólido pa yega na protekshon di nos laman i su biodiversidat dor di stimulá paisnan pa adoptá tratádonan ku ta protehá bida bou di laman, mitigá polushon di laman, stimulá mas investigashon sientifiko ku ta ligá na maneho pa mihó ehekushon, mihó maneho pa laman i stimulá aktividatnan ekonómiko di un forma sostenibel.
