E siman aki AVB lo reuní ku piskadónan di haf di Piskadera relashoná ku vandalismo na e haf

Willemstad – Resientemente servisio di agrikultura, krio bestia i peska (AVB) a tuma e desishon pa tene e entrada di haf di piskadó na Piskadera será despues di 8’ or di anochi. Esaki konforme AVB su tarea di mantené òrdu entre otro na e fasilidatnan di piskadó manera esun di Piskadera. Esaki ta nesesario pa evitá ku piskadónan ta bira viktima di ladronisia òf vandalismo aunke tur aktividat di piskadónan na e haf ta riba propio risiko.

AVB ta lamentá hopi e vandalismo ku a tuma lugá últimamente na haf di piskadó di Piskadera kual a indusí e servisio pa tuma medida. Komo ku práktikamente no tin piskamentu den oranan di anochi i mirando e echo ku e vandalismo ta tuma lugá den oranan lat di anochi, AVB a tuma e desishon pa por lo pronto diariamente sera entrada di haf di piskadó di Piskadera pa 8’ or di anochi.

AVB tin kontakto kontinuamente ku piskadónan. Den e siman aki AVB lo invitá piskadónan pa un enkuentro pa tende sugerenshanan i posibel opheshon kontra e medida di orario di sera e haf. Kolaboradónan di AVB a tene kombersashonnan ku diferente piskadó i basá riba esaki por konkluí ku gran mayoria di nan ta di akuerdo ku e medida.