𝘕𝘰 𝘵𝘢 𝘩𝘢𝘴𝘪 𝘥𝘦𝘵𝘦𝘯𝘴𝘩𝘰𝘯 𝘢𝘶𝘵𝘰𝘮á𝘵𝘪𝘬𝘰 𝗜𝗻𝘁𝗲𝗿é𝘀𝗻𝗮𝗻 𝘁𝗮 𝗽𝗿𝗶𝗺𝗼𝗿𝗱𝗶𝗮𝗹 𝗻𝗮 𝗺𝗼𝗺𝗲𝗻𝘁𝘂 𝗱𝗶 𝗱𝗲𝘁𝗲𝗻𝘀𝗵𝗼𝗻 𝗱𝗶 𝗲𝗸𝘀𝘁𝗿𝗮𝗻𝗵𝗲𝗿𝗼.

𝘕𝘰 𝘵𝘢 𝘩𝘢𝘴𝘪 𝘥𝘦𝘵𝘦𝘯𝘴𝘩𝘰𝘯 𝘢𝘶𝘵𝘰𝘮á𝘵𝘪𝘬𝘰

𝗜𝗻𝘁𝗲𝗿é𝘀𝗻𝗮𝗻 𝘁𝗮 𝗽𝗿𝗶𝗺𝗼𝗿𝗱𝗶𝗮𝗹 𝗻𝗮 𝗺𝗼𝗺𝗲𝗻𝘁𝘂 𝗱𝗶 𝗱𝗲𝘁𝗲𝗻𝘀𝗵𝗼𝗻 𝗱𝗶 𝗲𝗸𝘀𝘁𝗿𝗮𝗻𝗵𝗲𝗿𝗼.

Willemstad – Dia 30 di yüli 2025, Hòf a emití un desishon den apelashon ku Minister di Hustisia a presentá kontra un desishon anterior di Korte di Promé instante di dia 22 di yüli 2024. Hòf a deklará ku e apelashon tabata fundá.

Di akuerdo ku Hòf, Minister di Hustisia den pasado i awor tabata motiva sufisiente pa kiko ta tuma desishon pa detené e ekstranheronan den e kaso aki. Hòf tambe a konfirma ku tin base legal pa detené ekstranheronan ku a drenta ilegalmente na Kòrsou.

Ademàs, Hòf a determiná ku komo Minister di Hustisia e por tuma medidanan si tin un riesgo real ku e persona lo trata di evitá su obligashonnan, òf si e ta represéntá un peliger pa orden públiko òf pa seguridat. Den e kasonan aki, Hòf a konsiderá ku esey tabata e kaso, tumando na kuenta e manera ku e persona nan aki a yega na nos isla (ilegalmente den un lancha) i e situashon personal di e personanan involukrá.

Den un desishon anterior, Korte di Promé Instante a bisa ku e motibunan pa detené e dos personanan no tabata sufisientemente argumentá. Tambe a bisa ku no mester hasi distinshon entre hende ku a drenta ilegalmente i esnan ku a drenta legal, pero ku ta keda ilegal awor.

Di akuerdo ku Hòf mester evalua medidanan ménos severo promé ku detenshon, a ménos ku detenshon ta realmente inevitabel. E tipo di evaluashon aki mester tuma lugá meskos pa hende ku a drenta nos isla di forma ilegal.

Ta bon pa enfatisá ku ta Minister di Hustisia (lesa Gobièrnu di Kòrsou) a apelá e desishon aki. Minister di Hustisia, mr. Shalten Hato ta satisfecho ku e desishon di Hòf. E ta mira esaki komo un konfirmashon di e importansia pa motiva, pone di forma kla e motibunan i desishonnan ku ta ser tuma na momentu di detenshon di ekstranheronan.

E maneho firme di e Minister di Hustisia ta ku pa kada kaso di detenshon, meskos si e persona a drenta ilegal, mester tin un evaluashon individual i kuido. Minister Hato ta enfatisá ku su akshonnan ta den konformidat ku lei i prinsipionan di bon gobernashon. E tambe ta pone énfasis ku protekshon di seguridat di komunidat ta su prioridad number unu. Komo Minister di Hustisia e lo kontinuá ku su maneho pa sigui traha pa un manera balansá: protehá nos komunidat i respetá derecho humano.

Mas aleu Minister Shalten Hato ta enfatisá ku ningun hende no tin derecho pa drenta ilegalmente un pais. Supervishon di migrashon i kòntròl di frontera ta parti esensial di un politika di migrashon ordená i responsabel. Detenshon ta tuma lugá ora esaki ta legal i hustifiká den tur kaso.

Durante último dianan, medionan di komunikashon a duna hopi atenshon na e kaso aki.

Lamentablemente hopi di e notisianan no a pone sufisiente énfasis riba e echo ku Hòf a duna Minister di Hustisia rason tokante e motivashon pa e detenshonnan.

Mas aleu Minister di Hustisia ta enfatisá ku ta importante ku pueblo ta bon informá tokante e proseso legal i e kuadro legal ku ta aplikabel den situashon di migrashon na Kòrsou.

Minister Shalten Hato lo sigui traha pa garantisá seguridat di komunidat, ku rèspèt pa derecho di kada indivíduo.