Habitantenan di Rio Magdalena i Ronde Klip por hala rosea atrobe… Ministerio di GMN a laga limpia dos landfill ilegal ku tabata okashoná hopi molèster di huma

Habitantenan di Rio Magdalena i Ronde Klip por hala rosea atrobe…

Ministerio di GMN a laga limpia dos landfill ilegal ku tabata okashoná hopi molèster di huma 

Willemstad – Resientemente Ministerio di GMN a duna instrukshon pa laga limpia dos landfill ilegal, na Rio Magdalena i na Ronde Klip. Ku a akshonnan aki a eliminá e daño ku ta wòrdu hasí na naturalesa i a aliviá e intenso molèster di huma ku habitantenan di ámbos área pa hopi luna mester a soportá. Durante e lunanan ku a pasa Ministerio di GMN su departamentu di keho a risibí bastante keho di molèster di huma prosedente di e landfillnan aki.

E landfill na Rio Magdalena i esun na Ronde Klip ta dos di e sitionan ilegal ku pa hopi aña a keda uzá pa dump shushi. Durante e akshonnan menshoná a laga rekohé tur e shushinan pa asina eliminá e kandelanan, a basha greis i despues a sera e entradanan pa evitá ku ta sigui dump shushi na e sitionan aki. Esaki ta forma parti di e plan di Ministerio di GMN pa eliminá tur landfill ilegal riba nos isla ku ta forma molèster pa habitantenan. Huntu ku e akshonnan pa eliminá vários landfill ilegal aki ta formulando tambe maneho pa loke ta trata transporte i atendementu ku shushi komo parti di e proyekto DiBoPaBoKuBo di Minister Silvania kual lo sigui e aña aki.

Minister Pisas ta hasi un apelashon serio na komunidat di Kòrsou, pa stòp di tira shushi den mondi òf hasi uzo di landfill klandestino. Gobièrnu a sòru pa landfill ofisial na Mal Pais ta grátis, pues no tin niun sentido pa deshasí di shushi di forma ilegal. Ta huntu nos mester krea un Kòrsou limpi i bunita. Riba kombinashon di potrèt por mira kon shushi e sitio na Rio Magdalena tabata, i e resultado despues di e akshon di limpiesa.