Aksidente di tráfiko ku morto

KUERPO POLISIAL KÒRSOU

 

KOMUNIKADO DI PRENSA 348/2025

15 sèptèmber 2025

Aksidente di tráfiko ku morto

Djadumingu 14 di sèptèmber 2025 alrededor di 20.41’or, Sentral di Polis a dirigí unidat di Otrobanda na altura di un hotèl riba Pater Eeuwensweg, pa un vehíkulo ku a kai den awa.

Na yegada di e unidat, el a topa algun trahadó di e hotèl den e awa na entrada di e hotèl, tratando na saka un dama for di un vehíkulo.

For di investigashon preliminar ku polis a hasi na e sitio, a sali na kla ku e dama shofùr di e vehíkulo probablemente a bira malu tras di stür.

Testigunan a mira ku dado momento e velosidat di e vehíkulo ku e dama tabata manehá a oumentá, dal kontra di un opheto di betòn i bai bòltu den e awa.

Personal di brantwer a yega na e sitio pa yuda saka e vehíkulo for di awa i e dama for di e vehíkulo.

Seguidamente personal di ambulans a trata di duna promé asistensia na e víktima, pero sin e resultado deseá.

Dòkter di polis ku a yega na e sitio, a konstatá morto di e dama Olga Olmaris Elizabeth Pita da Silva, nasé na Kòrsou dia 23 di yüni 1996.

Personal di Departamentu di Tráfiko ta kontinuá ku e investigashon.