Sra. Meredith Daantje- Cecilia, MBA Blisc a selebrá 40 aña di servisio

 

Willemstad – Dia promé di òktober 2025, sra. Meredith Daantje-Cecilia a rekordá i selebrá e echo ku 40 aña pasa ela drenta servisio di gobièrnu.

Den ambiente ameno i festivo Sra. Meredith Daantje-Cecilia a selebrá i kompartí su 40 aña di eksperensia huntu ku koleganan i tambe demas invitadonan presente.
Sra. Meredith Daantje-Cecilia a traha durante e 40 aña di servisio tantu na Kòrsou i islanan-BES den diferente funshon i for di aña 2014 e ta e promé hende muhé Hefe Operashonal di prizòn i a la bes miembro di tim di maneho SDKK.
Na e okashon akí sra. Meredith Daantje-Cecilia a risibí su sertifikado di rekonosementu i un pin di 40 aña di servisio i tambe e dekreto di gobièrnu pa e 40 aña di labor prestá.
Tambe durante e sermonia Sra. Meredith Daantje-Cecilia a hiba un palabra gradisiendo tur persona ku a kontribuí na su karera laboral i tambe a duna vários konseho na tur ku tabata presente.
Gerensia i personal di SDKK ta deseá sra. Meredith Daantje-Cecilia tur klase di éksito i ku e sigui hasi e bon trabou manera semper.