25-043 

CBCS ta publiká investigashon riba entrada di invershon estranhero na Sint Maarten  Sint Maarten ta atrayendo ménos invershon estranhero  

 WILLEMSTAD/PHILIPSBURG — Di 2011 te awor, Sint Maarten a bini ta atraé ménos invershon  estranhero direkto (IED) kompará ku otro paisnan den Karibe ku tambe ta hopi dependiente di  turismo. Asina un investigashon resien di Centrale Bank van Curaçao en Sint Maarten (CBCS)  ta indiká. Maske Sint Maarten tin un ekonomia habrí i ta parti di Reino Hulandes, pa vários aña  kaba e kantidat promedio di IED ku ta drenta e pais akí komo porsentahe di su produkto interno  bruto (PIB) ta mas abou ku di e otro paisnan similar den region. E estudio ta duna un posibel  splikashon pa esaki, esta, ku Sint Maarten a yega un nivel madurá kaba den su desaroyo  turístiko i ku p’esei su kapasidat pa atraé mas invershon turístiko grandi a bira limitá. Segun  Jason Lista, Spesialista di CBCS riba tereno di análisis ekonómiko i investigashon, i outor di e  informe, e resultadonan akí por indiká ku Sint Maarten mester hiba su maneho den un otro  direkshon.  

 

*Paisnan ku tin un programa di e tipo ‘Citizenship by Investment’ 

IED ta di gran importansia pa Estado Insular Chikitu den Desaroyo (na ingles: SIDS), ya ku e  invershonnan akí ta genera entrada di divisa, empleo i traspaso di teknologia i abilidat. P’esei, ta  esensial pa Sint Maarten tin un konhunto di medida ku lo logra atraé i mantené invershon di kapital  riba término largu. E investigashon ta konopá estudionan konvenshonal riba tereno di IED ku 

otronan riba desaroyo di destinashon turístiko, usando un modelo bon konosí (Tourism Area Life  Cycle, òf TALC) pa purba komprondé kiko esei ta nifiká pa un estado insular chikitu manera Sint  Maarten. Esaki ta e promé bes ku a usa un investigashon empíriko, kombiná ku e modelo TALC, pa  konfirmá e datonan di statistik turístiko di Sint Maarten. 

E investigashon akí ta abordá e tema di dikon Sint Maarten su IED ta relativamente abou for di un  perspektiva nobo, no simplemente komo un resultado di defisiensia di maneho òf falta di  kompetitividat, sino komo un karakterístika struktural di un industria turístiko madurá, riba un isla  chikitu. E realisashon akí ta yuda aklará kousa di e bahada i na mes momento ta sirbi komo base  pa formulá strategia nobo, mas na midí, pa stimulá invershon i desaroyo den e próksimo  dékadanan. 

For di punto di bista di maneho, e resultadonan ta indiká ku den futuro, ora formulá strategia pa  atraé IED, mester tene kuenta ku e madures i saturashon menshoná. Kisas e stipuladónan di  maneho lo tin ku reorientá desaroyo turístiko pa enfoká riba turismo ku tin mas balor agregá i promové diversifikashon kaminda por, pa inkluí otro sektor ku ta komplementá, fortalesé i enrikesé  turismo. Por ehèmpel, por pensa riba proyekto di renovashon di infrastruktura, komo tambe  proyekto di turismo marítimo i agriturismo. Fuera di esei, ta masha importante pa fortifiká kapasidat  riba tereno di statistik, optené dato tokante entrada di IED riba un periodo mas largu, i refiná e  datonan statístiko di turismo pa tene mas kuenta ku parti franses di e isla, ya ku den futuro tur esaki  lo kontribuí na mihó investigashon empíriko i hasi posibel pa tuma desishon ku ta basá riba  evidensia. 

E rapòrt di investigashon kompleto ta disponibel na 

https://www.centralbank.cw/functions/research. 

Willemstad, 3 òktober 2025 

CENTRALE BANK VAN CURAÇAO EN SINT MAARTEN